ANGLI - Liverpooli regjistroi sot një fitore spektakolare 5-2 kundër West Hamit në shtëpi, në ndeshjen e vlefshme për raundin e 28-të të elitës së futbollit anglez, duke konfirmuar formën e shkëlqyer të skuadrës së drejtuar nga Arne Slot, me tre fitore radhazi.

Të kuqtë e nisën sfidën me intensitet të lartë dhe kaluan në epërsi që në minutën e 5-të, kur Hugo Ekitike finalizoi saktë pas asistimit të Ryan Gravenberch për 1-0. Dominimi i vendasve vazhdoi edhe më tej dhe në minutën e 24-t kapiteni Virgil van Dijk shënoi me kokë pas një goditjeje këndi, duke dyfishuar shifrat.

Pak para fundit të pjesës së parë, në minutën e 43-të, Alexis Mac Allister realizoi një supergol nga brenda zonës pas asistimit të Ekitikes, duke dërguar Liverpoolin në pushim me epërsi të thellë 3-0.

West Hami reagoi në fillim të pjesës së dytë, kur në minutën e 49-të Tomas Soucek shënoi për 3-1 pas pasimit të Malick Diouf. Megjithatë, vendasit rikthyen shpejt kontrollin dhe në minutën e 70-të Cody Gakpo realizoi për 4-1, pas një asistimi tjetër nga protagonisti i ndeshjes, Ekitike.

Londinezët nuk u dorëzuan dhe në minutën e 75-të Taty Castellanos shënoi me kokë për 4-2, por çdo dilemë mbi fituesin u shua në minutën e 82-të, kur Axel Disasi realizoi autogol, duke vulosur rezultatin përfundimtar 5-2 në favor të Liverpoolit.

Pas tre fitoreve radhazi Liverpooli ngjitet në kuotën e 48 pikëve për vendin e pestë.

S.Dh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 12 Prill, 11:12

    Dështojnë negociatat SHBA-Iran, e kujt mendoni se është përgjegjësia?

Lajme të tjera