Presidenti i Republikës, Bajram Begaj, ka nisur një vizitë në Luginën e Preshëvës, ku ka zhvilluar takime me kryetarët e komunave në Preshëve e Bujanovc, si dhe me deputetin shqiptar në Parlamentin e Serbisë, Shaip Kamberi, por edhe me kryetarin e Këshillit Kombëtar shqiptar, Enkel Rexhepin dhe përfaqësues të këtij Këshilli.

Përmes një postimi në rrjetet sociale, ku ka ndarë pamje nga takimet, Begaj ka shkruar se është pritur me flamurin Kombëtar shqiptar dhe me zemrat plotë, ashtu siç sipas tij, vëllau pret vëllanë.

Begaj ka shkruar gjithashtu se vizita e tij po zhvillohet në kuadër të forcimit e bashkimit të faktorit shqiptar, si dhe për projektet që do të ndihmojnë rininë shqiptare vendase.

Presidenti Begaj ka theksuar se i inkurajoi liderët politikë të kësaj treve të bashkohen sa herë bëhet fjalë për interesin kombëtar, për mbrojtjen e të drejtave të shqiptarëve të Luginës së Preshevës.

Teksa tha se i garantoi shqiptarëve të Luginës së Preshevës mbështetjen e Shqipërisë për përfaqësimin e drejtë në institucione, Begaj shtoi se i siguroi shqiptarët se do të vijojë të jetë avokat i të drejtave të mohuara të shqiptarëve të Luginës.

Reagimi i Begajt:

Vizitova sot Luginën e Preshevës, ku jetojnë shqiptarë në trojet e veta, fatkeqësisht jashtë trupit amë.

Më pritën me flamur e zemrat plot dashuri, si vëllai pret vëllanë. Biseduam me kryetarët e komunave, Ardita Sinani dhe Arbër Bajazitin, deputetin e vetëm shqiptar në Parlamentin e Serbisë, Shaip Kamberin, dhe kryetarin e Këshillit Kombëtar Shqiptar të Luginës së Preshevës, Enkel Rexhepin, për adresimin e shqetësimeve të shqiptarëve të Luginës, për forcimin e bashkimit të faktorit shqiptar, si edhe për projektet që do të ndihmojnë rininë e këtushme.

I inkurajova liderët politikë të kësaj treve të bashkohen sa herë bëhet fjalë për interesin kombëtar, për mbrojtjen e të drejtave të shqiptarëve të Luginës së Preshevës.

Si President i Republikës së Shqipërisë, u garantova mbështetjen e Shqipërisë për adresimin e çështjes së Luginës së Preshevës, përfaqësimin e drejtë në institucione, shqetësimin për pasivizimin e adresave, si dhe të drejtën e përdorimit të gjuhës amtare dhe të simboleve kombëtare.

I sigurova se do të vazhdoj të jem, si deri më tani, avokat i tyre, avokat i të drejtave të mohuara të shqiptarëve të Luginës në çdo institucion dhe kancelari ndërkombëtare.