Presidenti, Fajon nga Brukseli:
Mos bëni gabimet e së kalurës

TIRANE- Pak ditë përpara nisjes së procedurave zyrtare nga Parlamenti për zgjedhjen e Presidentit të ri të Republikës nga Brukeli vjen tjetër mesazh. BE ndjek me vëmendje dhe po monitoron Shqipërinë. Eurodeputetja Tanja Fajon deklaron se Parlamenti Europian po ndjek me vëmendje proces të drejtë dhe demokratik.

"Ne do e ndjekim procesin e zgjedhjes së Presidentit. Ne shpresojmë që ai të jetë një proces i drejtë e demokratik, sepse nuk duam të bëhen gabimet që kanë ndodhur në të kaluarën. Zgjedhja e Presidentit do të tregojë nëse vendi e ka arritur maturinë e mjaftueshme për të vazhduar integrimin evropian. Unë mendoj se ky vit mund të jetë vit shumë i rëndësishëm për Shqipërinë", ka thënë Tanja Fajon, eurodeputete, ish-raportuese për vizat me Shqipërinë në PE në një intervistë dje për Albanian Screen.

MBYLLNI REFORMEN ZGJEDHORE, MOS VONONI
Tanja Fajon kërkon gjithashtu që partitë të mos humbasin kohë në finalizimin e Ligjit të ri zgjedhor. “Është shumë e rëndësishme që reforma zgjedhore të përfundojë, që Shqipëria të tregojë maturi dhe kryesorja që zgjedhjet e reja të zhvillohen në mënyrë të drejtë e demokratike. Sepse në të kaluarën ne kemi parë shpesh që Shqipëria ka humbur kohë në përmbushjen e reformave të integrimit evropian. Mendoj se ky duhet të jetë fokusi tani: të mos ketë më vonesa", nënvizoi Fajon.

STATUSI NË DORËN E POLITIKËS
Lidhur me statusin, Fajon shprehet se është në dorën e klasës politike në Shqipëri nëse shqiptarët do të marrin statusin brenda këtij viti. Sipas saj, shansin historik të 100-vjetorit të Pavarësisë shqiptarët duhet ta përdorin për ta bërë këtë hap të ri drejt Bashkimit Evropian, sepse kjo është dëshirë e të gjithë qytetarëve dhe se "Shqipëria i përket Evropës".

BRENDA KËTIJ VITI NJË LIGJ I RI PËR VIZAT
Komisioni Europian brenda këtij viti pritet të miratojë edhe një ligj, i cili sipas Fajon pritet të përdor mekanizmin e bllokimit të përkohshëm të vizave vetëm në raste krize dhe si masë ekstreme.

"Ne po diskutojmë për mekanizmin e bllokimit të përkohshëm të regjimit të lirë të vizave. Është shumë e rëndësishme, sidomos për vendet e Ballkanit Perëndimor, që qyetarët të dinë se cilat janë rreziqet që ai mund të sjellë dhe në çfarë mënyre ata mund të parandalojnë abuzimet me lëvizjen e lirë. Kur ky mekanizëm për pezullim të përkohshëm të lëvizjes së lirë të miratohet, atëherë jo vetëm vendet e Ballkanit Perëndimor, por edhe vendet e tjera, nëse nuk respektojnë kushtet, rrezikohen të vihen në "listën e zezë" të Shengenit ose do t’ u rikthehet sistemi i mëparshëm i vizave", tha Fajon.
(sg/shqiptarja.com)

/Shqiptarja.com