Presidentja dhe Kryeministri i Kosovës
dënojnë ashpër sulmin mbi EULEX-in

KOSOVË - Presidentja e Kosovës Atifete Jahjaga dhe Kryeministri Hashim Thaçi kanë dënuar sot ashpër sulmin ndaj pjesëtarëve të EULEX-it në afërsi të Zveçanit, që la një të vdekur dhe dy të plagosur.

Presidentja Jahjaga deklaroi se "ky sulm ndaj EULEX-it është një akt plotësisht i patolerueshëm i forcave që kanë për qëllim destabilizimin e vendit tonë dhe prishjen e rendit kushtetues në kohën kur institucionet e Republikës së Kosovës po tregojnë pjekuri politike, duke u angazhuar të krijojnë një shtet gjithëpërfshirës.

Sulmi ndaj EULEX-it është sulm ndaj vlerave të shtetit të Kosovës. Sulmet e këtilla mbi praninë ndërkombëtare në Kosovë, në një periudhë të përgatitjeve për mbajtjen e zgjedhjeve komunale, që synojnë gjithëpërfshirjen, janë përpjekje për të krijuar klimë të pasigurisë dhe të frikës.

Kërkoj nga qytetarët vetëpërmbajtje dhe qetësi, me qëllim të krijimit të një klime të qetë në prag të zgjedhjeve, që do të mundësonte votim të lirë dhe të dinjitetshëm për secilin qytetar në çdo pjesë të Kosovës. Ftojmë organet e rendit dhe sigurisë që sa më shpejt të zbardhin rastin dhe të ndërmarrin të gjitha hapat që kryesit e këtij sulmi të përballën me drejtësinë.

Sot i kam telefonuar shefit të EULEX-it, Bernd Borchardt, për të shprehur ngushëllimet e qytetarëve dhe të institucioneve të Kosovës për vrasjen e kolegut të tyre,"- përunfodn deklarata e Jahjagës.

Po sot, edhe Kryeministri i Kosovës Hashim Thaçi e ka dënuar sulmin e armatosur kundër pjesëtarëve të Misionit të EULEX-it në Zveçan, ku si pasojë gjeti vdekjen një pjesëtar i EULEX-it.

Ai ka deklaruar se "ky sulm është një akt i shëmtuar dhe qyqar kundër sundimit të rendit dhe ligjit edhe në atë pjesë të territorit të Republikës së Kosovës dhe si i tillë është i dënueshëm nga qytetarët dhe institucionet e Kosovës."

Thaçi ka kërkuar nga organet kompetente që menjëherë të ndërmarrin të gjitha masat e domosdoshme që ata që e kryen këtë akt të nxirren para drejtësisë dhe të marrin dënimin e merituar."

Redaksia online
(ar.sh/shqiptarja.com)