Me 84 vota pro, miratohet amnistia penale! Do lirohen 466 të dënuar, nuk përfitojnë subjektet e SPAK! Rama në Kuvend, opozita bojkoton

Kuvendi i Shqipërisë miratoi sot me 84 vota pro ligjin për dhënien e amnistisë.

Pas votimit, Ministri i Drejtësisë, Toni Gogu, reagoi përmes një postimi në rrjetet sociale, ku e cilësoi vendimin si një hap me ndikim konkret në jetën e mijëra qytetarëve.

“Mes zhurmës së politikës së ditës, Kuvendi mori sot një vendim me pasoja konkrete për jetën e mijëra qytetarëve”, shkruan ministri.

Sipas Gogu, ligji i miratuar synon të garantojë sigurinë publike, të respektojë reformën në drejtësi dhe, njëkohësisht, të krijojë mundësi rehabilitimi për personat që plotësojnë kriteret e përcaktuara nga ligji.

“Ky është një ligj që mbron sigurinë publike, respekton reformën në drejtësi dhe njëkohësisht krijon mundësinë e rehabilitimit për ata që plotësojnë kushtet e përcaktuara nga ligji”, thekson ai.

Ministri i Drejtësisë nënvizon se shteti duhet të dijë të ndëshkojë kur është e nevojshme, por edhe të njohë momentin kur ndëshkimi e ka përmbushur qëllimin e vet.

“Shteti duhet të dijë të ndëshkojë kur është e nevojshme. Por duhet të dijë edhe të njohë momentin kur ndëshkimi e ka përmbushur qëllimin e vet. Ky është kuptimi i vendimit të sotëm”, përfundon reagimi i ministrit.

Foto: Ervin Salianji

Ervin Salianji ka reaguar për mungesën e opozitës e veçanërisht të Sali Berishës ku deputetë u mblodhën për të votuar rendin e ditës. Në një postim në rrjetet sociale, Salianji shprehet se Berisha kreu sot një tjetër akt tradhtie ndaj demokratëve dhe opozitarëve.

Ai nënvizon se kreu i PD po bën një teatër politik. Çdo ditë kërkon Ramën, por kur ky i fundit vjen ,Berisha braktis parlamentin.

“Sali Berisha kreu sot një tjetër akt tradhtie ndaj demokratëve dhe opozitarëve. Nuk është rastësi që gjithnjë e më shumë demokratë dhe qytetarë kërkojnë largimin e tij, duke e konsideruar pjesë të së njëjtës bashkëqeverisje me Edi Ramën. Në bashkëpunim me njëri tjetrin e kërkon Ramën me gjasme çdo ditë kur Rama mungon e ndërkohë që ai vjen në parlament, Berisha e braktis me një teatër që tani e kanë kuptuar të gjithë!

Në një moment kur qytetarët janë ngritur në këmbë kundër qeverisë dhe Shqipëria pret një përballje të fortë parlamentare me Ramën, Berisha zgjedh të bëjë teatër politik paradite, vetëm për t’i hapur rrugë dhe për të mos e vënë në vështirësi kryeministrin gjatë paraqitjes së tij në seancë.

Regjimi Rama–Berisha po i merr frymën demokracisë, po asgjëson opozitën reale dhe po bashkëqeveris në dëm të interesit publik. Shqiptarët meritojnë një alternativë të vërtetë, jo një konflikt të inskenuar që në fund i shërben mbajtjes së të njëjtit sistem në pushtet”, shkruan Salianji në rrjetet sociale.

Ministri i Brendshëm Besfort Lamallari e cilësoi miratimin në Kuvend të Amnistisë Penale një lajm të mirë për shumë familje shqiptare që do të kenë pranë njerëzit e tyre më të dashur, të cilëve do u jepet një mundësi e dytë përmes vullnetit të qeverisë shqiptare. 

“Miratimi sot në Kuvendin e Shqipërisë i amnistisë penale në vijim të hartimit dhe miratimit të saj në Këshillin e Ministrave në muajin janar të këtij viti është një lajm i mirë dhe i shumëpritur për shumë familje shqiptare, të cilat do të kenë pranë tyre njerëzit e dashur, përfshi kryefamiljarë, gra dhe të mitur, të cilët nga ky moment kanë nevojë më shumë për pranimin dhe mbështetjen nga shoqëria, pa gjykim dhe stigmatizim. Amnistia buron nga humanizmi dhe besimi i shoqërisë dhe institucioneve tek forca e ringritjes dhe kontributit të individit mbi një mundësi të dytë dhe jo ndëshkimit apo stigmatizimit të tij, e cila mishërohet përmes vullnetit të qeverisë shqiptare e udhëhequr nga vizioni për një politikë penale e cila duhet të shkëputet nga e shkuara me një natyrë thelbësisht represive dhe të përqafojë mendësinë dhe vlerat evropiane në një rrugëtim pa kthim të integrimit të vendit, qytetarëve dhe institucioneve shqiptare në gjirin e Evropës së bashkuar brenda 2030” shkroi Lamallari në rrjete sociale

Amnistia u miratua në Kuvend me 84 vota nga mazhoranca ndërsa deputetët e opozitës munguan në seancë. 

Agron Shehaj përjashtohet nga seanca plenare. Ai nuk lejoi zhvillimin e procesit të votimit, ndërsa në sallë ishte kryeministri Edi Rama, të cilit i kërkoi dorëheqjen.

“Vazhdoni në oborr me Tik-Tok-un tuaj. Te lulishtja”, i tha Peleshi-Shehajt ndërsa i njoftoi përjashtimin.

Seanca plenare ka rinisur sërish pas një pushimi prej gati dy orësh.

Kryesocialisti Edi Rama është i pranishëm në sallë, teksa ajo që shihet është mungesa e opozitës.