TIRANE - Vjedhësit e makinave dhe falsifikuesit e patentave do ta kenë të pamundur të vijojnë më tej aktivitetin e tyre pas hyrjes në fuqi të një projektligji, që ka mbërritur në Kuvend. Projektligji synon aderimin e Republikës së Shqipërisë në Traktatin për Sistemin Evropian të Informacionit për Automjetin dhe Lejen e Drejtimit, i cili u ofron mundësinë vendeve evropiane të shkëmbejnë informacione për regjistrimin e mjeteve dhe të drejtuesve të mjeteve. Sistemi nuk është një bazë të dhënash, por një mekanizëm shkëmbimi, që lidh regjistrat e mjeteve dhe drejtuesve të mjeteve të autoriteteve përkatëse të palëve.