Refuzuan sërish dialogun me Ramën, një grusht protestuesish në bulevard! Persona të maskuar përmbysin ‘stolat e dialogut’ dhe bllokojnë rrugën

Megjithëse të paktë në numër, një grup protestuesish kanë sulmuar me gurë në drejtim të efektivëve të Policisë, që ndodheshin në bulevardin Dëshmorët e Kombit.

Këta të fundit u janë përgjigjur duke u hedhur ujë, në mënyrë që të bënin të mundur shpërndarjen e protestuesve.

Protestuesit para Kryeministrisë kanë hedhur gurë në drejtim të policisë. Në përgjigje, efektivët kanë përdorur autobotin me ujë për të shpërndarë turmën.

Ndërkohë, përmes megafonit policia u ka bërë thirrje protestuesve të ndërpresin veprimet e dhunshme ndaj institucioneve.

“Ndërprisni veprimet e dhunshme ndaj institucioneve”, ishte apeli i përcjellë nga efektivët e policisë.

Është ora 19:00 dhe me dhjetëra protestues janë rikthyer në bulevardin përballë Kryeministrisë për të vazhduar protestën kundër qeverisë.

Një grup syresh, të veshur me të zeza, me maska, shtyjnë stolat e gurtë të dialogut duke krijuar një bllokadë kundër autobotit të ujit të parkuar aty pranë, si për të sinjalizuar që po përgatiten për sulm

Pamjet me dron të orës 14:20 tregojnë përmasat reale të protestës së sotme kundër qeverisë. Në Bulevard janë mbledhur një grusht me njerëz, një pjesëmarrje ndjeshëm më e ulët në krahasim me 9 ditët e tjera.

Një gjest njerëzor nga efektivët e policisë gjatë protestave në Tiranë. Mes angazhimit për ruajtjen e rendit dhe sigurisë, disa policë janë ndalur për të ndihmuar një qytetar në nevojë, duke i dhënë bukë, para dhe cigare.

Momenti është fiksuar në video dhe tregon një tjetër anë të punës së efektivëve, të cilët, përveç detyrës për të garantuar sigurinë gjatë protestave, kanë gjetur kohë edhe për të ndihmuar një person në nevojë.

Me të mbërritur përballë Kryeministrisë, grupi i protestuesve refuzuan sërish kërkesën për dialog të kryeministrit Rama, duke hequr stolat prej guri që u vendosën sot para kryeministrisë me thirrjen për dialog me protestuesit.

Stolat e vendosur në trotuar u përmbysën dhe u shtynë në rrugë ndërkohë që protestuesit përsëritën thirrjen për dorëheqjen e kryeministrit. 

Grupi i protestuesve që u mblodhën para Kuvendit është zhvendosur në bulevardin kryesor të kryeqytetit ku po marshojnë drejt kryeministrisë. 

Pjesëmarrja është e ulët, ndërkohë që për momentin qarkullimi i automjeteve në bulevard vazhdon normalisht 

Një orë pas mesditës, gjendja në rrugën përballë Kuvendit është e qetë. Aty janë mbledhur një grusht protestuesish, gazetarë, kameramanë dhe forca rendi, ndërkohë që ka edhe kalimtarë të shumtë. Forcat e rendit janë pozicionuar përballë Kuvendit për të penguar afrimin e protestuesve.  

Protestuesit po vijojnë marshimin e tyre drejt rrugës kryesore pranë godinës së Kuvendit. Perimetri i sigurisë është hequr nga ana e efektivëve pas përfundimit të seancës plenare ndërkohë që pritet të shihet drejtimi që do të marrin protestuesit pas shpërndarjes së deputetëve.

Përmes një pankarte, protestuesit thonë se pavarësisht ftesës për dialog, kryeministri Rama pranon vetëm monolog.

“Edi Rama kërkon dialog? Dialog është vetëm një fjalë për të tjerët. Në realitet, Edi Rama nuk pranon dialogun, ai bën vetëm monolog!”, thuhet në pankartë.

Një grup protestuesish janë mbledhur në rrugën “George W. Bush”, pranë Kuvendit. Herë pas here dëgjohen thirrjet “Poshtë diktatura”, ndërsa atmosfera për momentin mbetet e qetë.

Një protestuese me shami dhe maskë kirurgjikale në fytyrë, është përplasur me një prej policëve përballë Xhamisë së Namazgjasë. Ajo e shtyn disa herë dhe më pas e godet me shuplakë.