Nesër mblidhet kongresi i PS, votohet asambleja e re! Fokus: Turizmi, antikorrupsioni e mirëqeverisja

Mes sfidës për të riformatuar vetveten dhe për të çuar përpara qeverisjen pas 11 vitesh në pushtet, të dielën Partia Socialiste do të mbledhë Kongresin.

Në fokus të punimeve që nisin në orën 11 në Pallatin e Kongreseve, do të jenë mirëqeverisja, anti-korrupsioni, si dhe rienergjizimi i partisë, me synimin që selia rozë nuk e fsheh për të qeverisur edhe për një mandat të katërt vendin.

Fjalimi kryesor, sikurse është traditë, do t’i përkasë pikërisht numrit një të socialistëve, Edi Ramës ndërsa fjalë do të mbajnë sipas fushave të përgjegjësisë edhe ministrat e drejtuesit më të lartë të PS.

Pak ditë më parë, kreu i grupit parlamentar të PS Bledi Çuçi tha se një fokus të veccantë në diskutime do të ketë turizmi.

‘Pjesa e parë do të jetë me shumë interes, pasi do të flasim për çështjen e shtetit të së drejtës dhe do flasim për gjithë përpjekjet për ta bërë Shqipërinë një yll polar në rajon. Në pjesën e dytë do të zgjedhim anëtarët për Asamblenë Kombëtare që del nga delegatët.’- tha kreu i grupit parlamentar të PS-së Bledi Çuçi pak ditë më parë në një konferencë për mediat.

Në pjesën e dytë anëtarët e Kongresit Zgjedhor do të votojnë për të zgjedhur Asamblenë e re socialiste. Asambleja e PS ka rreth 400 anëtarë, por Kongresi do të zgjedhë vetëm 156 prej tyre, pasi anëtarët e tjera janë automatikisht për shkak të funksionit.

Kryeministri Rama pak ditë më parë kërkoi që asnjë drejtor në institucione të ndryshme në nivel vendor e qendror të mos përfshihet në listat për Asamblenë e re Kombëtare.

M.Q./Shqiptarja.com

TAG:
• PS
• edi rama