Mbi 900 vende pune janë hapur dhe mbi 5000 të rinj janë punësuar në treg gjatë fazës së parë të projektit Risi Albania. Ky projekt i mundësuar nga Agjencia Zvicerane për Zhvillim dhe Bashkëpunim, synon rritjen e punësimit të të rinjve në Shqipëri, duke përmirësuar shanset për punësim dhe të ardhura për të rinjtë e moshës 15 deri 29 vjeç.

Gjatë hapjes zyrtare të fazës së dytë, Ambasadori i Zvicrës në Shqipëri, Christoph Graf, u shpreh se puna për krijimin e vendeve të reja të punës do të vijojë.

"Programi i bashkëpunimit zviceran me Shqipërinë ka një pjesë të mirë të përkushtuar ndaj arsimit profesional, punësimit dhe zhvillimit të sektorit privat. Kjo fazë e dytë do të ketë më shumë në fokus tek bashkëpunimi me sektorin privat për të përfshirë më shumë nga segmentet e prekshme të popullatës si përfitues”., tha Ambasadori i Zvicrës në Shqipëri, Christoph Graf

Zëvendës ministrja e Financës, Ekonomisë dhe Punës Dajna Sorensen foli edhe mbi nevojën e informimit të të rinjve për mundësitë që ofron tregu. 

“Risi Albania ka kontribuar në mënyrë domethënëse në ndërmjetësimin e punësimin nëpërmjet informacioneve të përmirësuar të tregut të punës, por u kanë folur në radhë të parë të rinjve me një gjuhë që bën sens”, tha Dajna Sorensen.

Ndërsa menaxherja e RisiAlbania Edlira Muedini, prezantoi fazën e dytë të këtij projekti.

"Projekti në këtë fazë të dytë do të vijë me një fokus më specifik duke filluar me sektorin e agro-biznesit ku fokusi do të jetë nënsektorial. Sektori i fruta perimeve dhe i bimëve medicinave dhe aromatike janë dy nënsektorët e parë të fokusuar për mbështetje për të kaluar më pas në sektorin e Turizmit ku fokusi do të jetë rajonal”, tha Edlira Muedini, menaxhere e RisiAlbania.

Gjatë viteve të fundit niveli zyrtar i papunësisë së të rinjve ka qenë rreth 30%. RisiAlbania u krijua në vitin 2013 për të adresuar problemin e papunësisë tek të rinjtë, një projekt që mbështetet nga Agjencia Zvicerane për Zhvillim dhe Bashkëpunim. 

Redaksia Online
J.Sh Shqiptarja.com