Drejtori i portit Durrës pas 10 muajsh largohet me ironi: Mbarova misionin tim

10 muaj pas emërimit në detyrë jep dorëheqjen nga posti i drejtorit të përgjithshëm të Autoritetit Portual Durrës, Agron Tare. Njoftimin e ka bërë vetë Tare, por jo në nivelin që i ka hije një drejtuesi për postin që mbante.

Duke lënë të nënkuptuar se po ikën me një frymë polemike, teksa porti i Durrësit në kohët e fundit ka qenë në qendër të problemeve për shkak të kontenierëve që janë kapur me kokainë dhe hetimeve që nisën për disa punonjës, Agron Tare ka zgjedhur që ta mbyllë reagimin dhe 'misionin' me një batutë ironike në gjuhën italiane me një konotacion negativ dhe jo në nivelin e postit që mbante.

"Sot mbaron misioni im si Drejtor i Përgjithshëm Ekzekutiv i Autoritetit Portual Durrës. Që prej marrjes së detyrës si Drejtor i Përgjithshëm Ekzekutiv i Autoritetit Portual Durrës, kam shërbyer më devotshmëri dhe pasion për punën, gjë që e tregojnë rezultatet e deritanishme financiare të këtij institucioni. Dorëhiqem për të vijuar rrugëtimin tim profesional dhe duke i uruar pasardhësit/es tim/e suksese! Nuk mund të lë pa falenderuar ata që më besuan këtë pozicion të rëndësishëm, ekipin e APD-së, bashkëpunëtorë të mi, të afërt e të largët! Ciao a tutti, belli e brutti!” shkruan Agron Tare.

Pak javë më parë Prokuroria e Krimeve të Rënda në kuadër të dosjes së 137 kg heroinë zgjeroi grupin e personave që mund të kenë gisht në trafikim. Nën hetim u vendosën një numër i lartë të zyrtarëve të Portit të Durrësit duke verifikuar lëvizjet e të gjithë atyre personave që kanë kryer hyrje-dalje në Port, e që nuk kanë qenë të autorizuar për të hyrë në brendësi të tij. Sipas prokurorisë, dyshohet se ata kanë krijuan favorizime për hyrjen e personave të paautorizuar në Port.

TAG:
• porti durres
• agron tare
• gentian doci