Presidenti i SHBA-së, Donald Trump, deklaroi se administrata e tij do t'u kërkojë vendeve evropiane të rimbursojnë Shtetet e Bashkuara për ndihmën ushtarake dhe municionet e dërguara më parë në Ukrainë gjatë luftës me Rusinë.

Në një postim në rrjetet sociale, Trump kritikoi administratën e ish-presidentit Joe Biden, duke thënë se "qindra miliarda dollarë" iu dhanë Ukrainës dhe NATO-s pa pagesë, ndërsa sipas tij këto shpenzime duhej të ishin mbuluar nga Evropa.

"Qindra miliarda dollarë iu dhanë Ukrainës dhe NATO-s falas, ndërkohë që Evropa do të kishte paguar për to po të ishte pyetur. Tani do t'i kërkojmë ato para, edhe pse me vonesë", shkroi Trump.

Në të njëjtin reagim, presidenti amerikan hodhi poshtë raportimet për rënie të rezervave amerikane të municioneve, duke theksuar se SHBA po rrit prodhimin dhe po krijon rezerva të reja. Ai la të kuptohet gjithashtu se shitjet e municioneve për vendet aleate do të pezullohen përkohësisht, pasi prioritet do të kenë nevojat e ushtrisë amerikane.

"Po i mbajmë për veten tonë, për SHBA-në, në vend që t'ua shesim të tjerëve, por shitjet për aleatët do të rifillojnë së shpejti", u shpreh Trump.

Reuters kujton se vitin e kaluar SHBA-ja dhe NATO krijuan nismën Prioritized Ukraine Requirements List, sipas së cilës vendet evropiane paguajnë për furnizimin e Ukrainës me armë amerikane.

Deklaratat e Trump vijnë në një kohë kur administrata amerikane përballet me shqetësime për rezervat e municioneve, pas përdorimit të një pjese të madhe të raketave me rreze të gjatë gjatë luftës me Iranin. Sipas Reuters, zhvillimet në Ukrainë dhe Lindjen e Mesme, si edhe ndikimi i tyre në tregjet e energjisë, pritet të kenë edhe peshë politike në SHBA përpara zgjedhjeve të ardhshme.