"Agon" vijon drama e fortë në kinema

Ka hyrë në fundjavën e dytë të projeksioneve filmi "Agon". Drama e fortë shqiptare po shfaqet në të dyja rrjetet e kinemave, Millennium dhe Imperial. Kështu pas premierës botërore në garën zyrtare të regjisoreve të rinj filmi fillon projeksionet edhe për publikun shqiptar. "AGON" është shkruar dhe drejtuar nga Robert Budina ndërsa produksioni i është besuar Sabina Kodrës. Filmi sjell në ekranin e madh historinë e dy vëllezërve, Saimir dhe Vini të cilët përpiqen të integrohen në një vend të huaj secili në mënyrën e tij, duke ndjekur dy mënyra të ndryshme jetese, pa kthim mbrapa... Filmi është një dramë e fortë dhe e drejtpërdrejtë që përcon emocione të vazhdueshme në cdo minutë. Më tepër sesa të trajtojë një temë sic është emigracioni, regjisori ka synuar të sjellë tek publiku historinë e një familjes shqiptare, duke mos mbajtur qëndrim dhe duke treguar gjithcka të vërtetë deri në fund.

Në kastin e aktorëve janë Marvin Tafaj, Guljem Kotori, Isabella Kogevina, Xhevdet Jashari, Eglantina Cenomeri, Laert Vasili dhe Adonis Kafetzopulos. Për këtë film në krah të tij Budina ka mbledhur disa emra mjaft të njohur duke filluar nga Marius PANDURU fitues i Palmës së Artë në Kanë, më 2006 me "12.08 East of Bucharest" të Korneliu Polomboiu. Kostumet vijnë nga Ermir GRAMO, kostumiere e filmave "Falja e Gjakut" dhe "Amnistia" që të dy pjesmarrës në Festivalin e Berlinit me 2011 që morën çmime të rëndësishme.

Filmi u xhirua në Shqipëri dhe në Selanik të Greqisë, me një përzierje aktorësh grekë e shqiptarë dhe me një trupë teknike shqiptaro-greko-rumune. Ai është një bashkëprodhim i ERAFILM SHQIPERI, INKAS FILM GREQI, ELEFANT FILM RUMANI, ARIZONA FILM FRANCE me mbëshetjen financiare të Qendrës Kombëtare Kinematografike Shqiptare, Greke dhe Rumune, të Eurimages dhe me bashkëfinancues SEE, CHAINSAË EUROPE ROMANIA, NOVA, N-ORASIS GREQI. Filmi ka skena te forta dhune dhe erotike. Nuk këshillohet për moshat nen 16 vjeç dhe për ata që nuk durojnë dot emocionet e forta.

Shkrimi u publikua sot në Suplementin Fundjava, në gazetën Shqiptarja.com(print) 14 dhjetor 2012

(ad.ti/shqiptarja.com)