"Vetëvendosje!" mbron Alma Lamën
nga sulmet e forumit mysliman

PRISHTINË - Vetëvendosje i del në mbrojtje ish-deputetes së saj, Alma LamaLëvizja Vtëvendosje! e dënon fuqishëm letrën e dytë të të ashtuquajturit “Forumi i të Rinjve Myslimanë” në të cilën përsëri me shprehje përçarëse dhe kërcënuese ofendohet deputetja Alma Lama.

Pak ditë pasi Alma Lama ka braktisur lëvizjen Vetëvendosje, kjo e fundit i ka dalë asaj në mbrojtje nga sulmi verbal, që i është bërë asaj përmes një letre, të shkruar nga “Forumi i të Rinjve Myslimanë”.

“Lëvizja Vetëvendosje! e dënon fuqishëm letrën e dytë të të ashtuquajturit “Forumi i të Rinjve Myslimanë” dërguar mediave, në të cilën përsëri me shprehje përçarëse dhe kërcënuese ofendohet deputetja Alma Lama dhe provohet të kapitalizohet dalja e saj nga Lëvizja Vetëvendosje! Mesazhet që cenojnë dinjitetin e zonjës Lama, por edhe atë të kombit shqiptar janë të papranueshme”, thuhet në komunikatën e VV, të cilën boton "Koha Ditore" në Kosovë.

Më tutje ajo thekson se është kundër çdokujt, që diskriminon e fyen në çfarëdo bazash. “Duam të vëmë theksin se Lëvizja VETËVENDOSJE! nuk ka nevojë për mbështetjen e atyre që diskriminojnë dhe fyejnë dinjitetin e qytetarit mbi baza të prejardhjes apo identiteteve gjinore e kulturore, e as për mbështetjen e atyre që s'e respektojnë kombin.

Kufiri midis Kosovës dhe Shqipërisë nuk është as kufi yni e as i vendosur aty paqësisht. Pranimi dhe afirmimi, normalizimi dhe natyralizimi i atij kufiri është i padrejtë dhe i dëmshëm.  

Qëndrimet tona për secilën çështje janë të qarta e parimore, dhe janë vendime të marra në mënyrë demokratike, nga organet legjitime të Lëvizjes”, nënvizon më zutje VV në reagimin e saj.

Ndërkaq kjo lëvizje i ka cilësuar, veç tjerash si antikombëtare disa nga akuzat e FRM. “Thirrjet që Alma Lama të kthehet në Shqipëri, sepse nuk e ka vendin këtu janë thirrje injorante, seksiste dhe antikombëtare".

"Deputetja Lama ka dhënë dorëheqjen nga Lëvizja VETËVENDOSJE!, megjithatë ne jemi vendosmërisht kundër çfarëdolloj cenimi ndaj saj apo të cilitdo qytetar dhe do t'i kundërshtojmë ofendimet, përbuzjet apo kërcënimet e tilla”, përfundon reagimi i lëvizjes Vetëvendosje.

Redaksia Online
(mag/shqiptarja.com)