Rama: Berisha bluan dokrra
Qeveria në zverkun e biznesit

TIRANE - Kryeministri Sali Berisha sulmoi sot opozitën në lidhje me sistemin e taksave progresive. Sipas tij, “ata që kërkojnë të kthehen kohërat e atyre taksave që i lanë mbrapa, luftojnë me mullinjtë e erës”.

Përgjigjja ka ardhur nga direkt nga lideri i socialistëve, Edi Rama, përmes një mesazhi në Twitter: “Opozita luftuaka me mullinjtë e erës kur kërkon taksim të ndërshëm? – pyet Rama – Jo, Kryeministrit po i merr era mullirin ku bluan dokrrat e tij e pasuritë e popullit”.

Sipas kreut të PS, “biznesi s’ka problem barrën fiskale por barrën e korrupsionit, ryshfeteve, gjobave, referencave, barrën e qeverisë që i ka hipur në zverk”.

Kryeministri deklaroi sot gjithashtu se në vendin tonë “bujqësia dhe agrobiznesi në tërësi përbën mjaft problem”. Dhe për ta zgjidhur këtë ai sygjeroi që “me anë të ndihmave të BE-së duhet të përcaktojmë një pjesë të mirë të tyre për bujqësinë”.

Por Rama replikoi se “kjo ndihmë vjen pas statusit”. Dhe kjo është “një arsye pse statusi s’digjet për Jozin e Ristanin”, tha kryesocialisti duke iu referuar debateve mes mazhorancës dhe opozitës mbi çështjen e presidentit të ardhshëm dhe atë të reformës zgjedhore.

(im/shqiptarja.com)

/Shqiptarja.com