Pas deklaratës së kreut të PD, Lulzim Basha se marrëveshja e 5 qershorit është prishur ka reaguar kryeministri Edi Rama. Në një status në twitter, kreu i qeverisë i konsideron deklaratat e kryeopozitarit kërcënime, ndërsa e këshillon që të mos bëjë provokime.

"Një këshillë miqësore për Lulzim Bashën e kolegët opozitarë jashtë Kuvendit: Lërini sharjet e kërcënimet ju lutem e mos thoni u prish marrëveshja,se ajo marrëveshje u bë me ju e për ju, jo për ne! Ne s'donim e s'duam administratë zgjedhore partiake, prandaj mos na provokoni se s’ua kemi borxh as ne, as populli jo e jo,pasi morët gjithçka deshët! Peng Kuvendin e zgjedhësit,të cilëve do t'u japim mundësinë të votojnë për deputetin e jo vetëm për partinë,nuk i merrni dot! Po mos na nxisni kundër asaj marrëveshjeje që e bëmë për ju po na lini ta votojmë...", shkruan Rama në twitter.

Një ditë më parë, Kryetari i PD-së, Lulzim Basha u shpreh se Edi Rama prishi marrëveshjen për reformën zgjedhore që u arrit në datë 5 qershor. Për liderin demokrat, frika e Edi Ramës buron te koalicioni opozitar. Kryedemokrati theksoi se listat e hapura bëhen me ndryshime në Kodin Zgjedhor, por Rama do të ndërhyjë në Kushtetutë për të hequr koalicionet.