Rama: Jemi kundër grabitjes
me vendim qeverie, jo investimeve

TIRANE – “Po, do bëjmë transparencë të plotë për grabitjet me vendim qeverie”. Përmes disa mesazheve të publikuara në Twitter, kryesocialisti Edi Rama i përgjigjet ftesës së Kryeministrit Berisha për të kontrolluar “në çdo qelizë veprimtarinë e qeverisë”.

Rama hodhi poshtë akuzat e Berishës sipas të cilave opozita del gjithmonë kundër sipërmarrjes private. “S’jemi kundër investimeve jo, jemi kundër grabitjeve të pasurisë publike me vendime qeverie”. Ai paralajmëroi “klientët e qeverisë” se kur të vijë në pushtet do të bëjë “transparencë totale”.

Socialistët nuk janë “kundër ndërtimit të rrugëve, siç thotë marrëzisht Kryeministri” por “kundër batërdisë korruptive me rrugët që prishen ende pa mbaruar puna”, nënvizoi kryesocialisti Rama.

Sipas Ramës, mazhoranca ka pasur në dispozicion “7 vjet para pafund për të ndërtuar rrugë e deri më sot as dhe një rrugë e standardeve evropiane në projektim, realizim, qëndrueshmëri. Maskaradë!”.

MAZNIKU: BERISHA GENJEN PER PUNESIMIN

Përveç kryetarit Rama, ndaj deklaratave të Kryeministrit reagoi sot edhe socialisti Arbër Mazniku, drejtues i grupit të punës për punësimin, i cili akuzoi Berisha se gënjen kur flet mbi këtë temë.

“Kjo qeveri ka dështuar – tha Mazniku – punësimi nuk është rritur” siç deklaroi sot Kryeministri në mbledhjen e qeverisë. “Berisha premtoi 8 mijë vende pune ndërsa sot janë vetëm 4 mijë të punësuar. Fondi për punësimin ka rënë më shumë se dy herë dhe në vitin 2011 janë punësuar vetëm 569 persona”, tha Mazniku.

(im/shqiptarja.com)