Rama: Korrupsioni me pronat
po gërryen themelet e vendit

TIRANE – Partia Socialiste ka mbledhur sot tryezën e diskutimit në lidhje me çështjen e pronave. “Mbi fjalën pronë rëndon hija e pasigurisë”, tha lideri Edi Rama gjatë fjalës së tij. “Ky shtet është vetë hija e pasigurisë që duam të largojmë” tha Rama, që shtoi: “Duam t’i japim fund rrënimit të mëtejshëm të pronës publike”.

Ai tha se forcat politike në këto vite kanë dashur të marrin vetëm votat e pronarëve. Për këtë, sipas tij, “mungon sot një shtet që të mbrojë pronën publike dhe private”.

“Korrupsioni me pronat po gërryen themelet e ekonomisë, financave dhe po shpërfytyron pamjen e këtij vendi”, tha Rama, sipas të cilit “demokratizimi i marrëdhënieve me pronën është sot një emergjencë kombëtare për t’i ridhënë mundësisë Shqipërisë që të rimarrë frymë”.

Rama rikujtoi se në lidhje me pronën në Shqipëri ka 16 ligje dhe 8 institucione që ndërthuren me njëra-tjetrën: kjo e bën të “pamundur që të demokratizohet marrëdhënia e kësaj shoqërie me pronën”.

“S’ka rilindje të ekonomisë pa zgjidhur çështjen e pronave”, pohoi lideri i Partisë Socialiste.

Përsa i përket problemit të legalizimeve të pronave, Rama tha se “sot pas 7 vjetës ka vetëm një të re: ka ikur Shaban Memia”. “Qytetarët duhet ta kenë shumë të qartë – tha ai - me këtë qeveri çdo votë që japin shton ndërtimet pa leje”.

(im/shqiptarja.com)

/Shqiptarja.com