‘Rama ktheu PS në stallë lopësh’ Balla i përgjigjet Bashës: Luli t’i referohet socialistëve për organizimin e partisë, dora e shtrirë për bashkëpunim

Pas mbylljes së mbledhjes së Asamblesë së PS, kreu i grupit parlamentar të Partisë Socialiste Taulant Balla deklaroi jashtë selisë rozë se dora e shtrirë për bashkëpunim me PD vijon të qëndorjë, kushdo që të jetë kryetar i PD-së. Në lidhje me deklaratën e Lulzim Bashës ditën e sotme nga Kamza, ku tha se ‘Rama e ka thyer PS në stallë lopësh’, Balla tha se Basha duhet t’i referohet socialistëve për modelin e partisë dhe organizimin e saj.

“Po çfarë të them unë për Lulin. Luli kur i referohet PS-së duhet t’i referohet si model i një partie që ka organizim të pakrahasueshëm dhe të gjithë anëtarët e vet i ka të disponueshëm. Nuk po hyj në debatin e asaj partisë që nuk dihet kush do votojë më 13 qershor. Ne vazhdojmë ta mbajmë dorën e shtrirë dhe dëshirën tonë të pakushtëzuar për t’u ulur me PD-në sapo të fillojë legjislatura e re, me këdo që do jetë kryetar i PD. Maxhoranca ka detyrat e veta, opozita ka detyrat e veta, Duhet të gjejmë gjuhën e përbashkët për të çuar para shumë reforma që kërkojnë një shumicë që ne nuk e kemi. Unë mendoj që është koha e duhur për të lënë mënjëanë pakënaqësitë por të shohim kush është votuar. Ka një shumicë që ka votuar për PS por ka dhe një pakicë që ka votuar për PD dhe ata presin që mandati t’i shërbejë Shqipërisë. Ne do të themi që kur flasim pa kushte, përballë PD-së është një letër e bardhë ku ata mund të propozojnë çështje. Është koha të gjejmë mundësinë që pas 9 shtatorit që në kuvend të vazhdojmë të diskutojmë. Kemi çështje që lidhen me reformën zgjedhore”, tha Balla.

Lajmi kryesor:

Rama niset në Turqi, PS mbledh online Asamblenë, miratohen 6 vendime! Ngrihet komisioni për të analizuar 25 Prillin! Balla: Do fillojmë fushatën më të madhe për hapjen e partisë

/b.ha./Shqiptarja.com

TAG:
• edi rama
• Tirane
• PS
• asambleja e PS
• kongresi i ps
• zgjedhjet parlamentare 2021