Në fillim të dimrit pritet gjysma e rrugës Korçë – Ersekë do të jetë gati për të evituar një pjesë të aksit të vjetër. Këtë e njoftoi kryeministri Edi Rama në Facebook, ku postoi edhe fotografi gjatë punimeve.

“Dhe me ritmin e shpejtë të punës për ndërtimin e rrugës Korçë - Ersekë, ku pritet që brenda fillimit të sezonit dimëror, gjysma e aksit të përshkohet në shtratin e gjurmës së re, duke evituar njëherazi një pjesë të udhëtimit nga aksi i vjetër, ju uroj një ditë të mbarë”, shkroi Rama.

Aktualisht aksi rrugor Korçë-Ersekë ka një gjatësi prej 45 kilometrash, ndërsa me përfundimin e segmentit të ri distanca shkurtohet në 35 kilometra. Po kështu, aksi i ri do të ketë të gjithë elementët e nevojshëm që lidhen me sigurinë rrugore. Ndërtimi i tij do të nxisë zhvillimin e mëtejshëm turistik të juglindjes së vendit duke afruar më pranë dy zona me mjaft potenciale, siç është Korça dhe Erseka.