Kombëtarja shqiptare e futbollit barazoi dje 1-1 kundër Moldavisë në transfertë dhe zyrtarisht kuqezinjtë janë në fazën finale të Europianit 2024, që do zhvillohet verën që vjen në Gjermani. Minuta e 25-të ishte deçizive për tanët, që me sulmuesin kavajas Sokol Cikalleshi shënuan nga 11 metërshi i fituar prej Seferit.
Në transfertën e djeshme drejtuesit zgjodhën që ekipi të vishte fanellën e tretë, atë të zezë. Pikërisht kjo uniformë ka shënjuar tanët në tre sukseset historike që mbahen mend nga të gjithë tifozët.
Si fillim le të ndalemi te 11 tetori i 2015, kur fitorja 0-3 në Armeni na dha të drejtën që për herë të parë të luanim në fazën finale të një Europiani, pikërisht "Francë 2016". Autogoli i Kamo Hovhannisyan në minutën e nëntë, goli i Gjimshitit në të 23' dhe Sadiku në minutën e 76 vulosnin fitoren që na dërgoi në Europian për herë të parë. Ishte fanella e zezë e veshur në atë takim.
Kombëtarja feston suksesin në Armeni, 11 tetor 2015
Pas kalimit në finalet e "Francë 2016", tanët humbën dy ndeshjet e para me Zvicrën (1-0) dhe Francën (2-0). Kundër helvetëve ne vishnim fanellën kuqezi, ndërsa kundër vendasve atë të bardhë. Në ndeshjen e tretë, fituar 1-0 kundër Rumanisë me gol të Sadikut. Shqipëria kishte veshur uniformën e zezë.
Shqipëri 1-0 Rumani, 19 qershor 2016 - Euro 2016
Edhe në suksesin e fundit historik, atë barazim 1-1 kundër Moldavisë në transfertë, që na dha të drejtëm për "Gjermani 2024", ekipi ishte veshur me uniformën e tretë, atë të zezë. Besëtytni apo jo, e zeza i ka sjellë fat Kombëtares.