Reagimi i Ramës për përplasjen Kurti-Vuçiç në OKB, Basha: Flet si perëndimor, vepron si lindor! Kosovës nuk i duhen leksione demokracie nga një autokrat

Kryetari i Partisë Demokratike, Lulzim Basha ka reaguar pas deklaratës së kryeministrit Edi Rama sa i takon përplasjes Kurti-Vuçiç në Këshillin e Sigurimit të OKB-së për heqjen e dinarit serb në Kosovë.

Basha tha se Kosova nuk ka nevojë për leksione demokracie nga Rama të cilin e cilësoi si ‘autokrat’. Sipas tij, Rama nuk e trajton sigurinë e Kosovës si çështje të sigurisë kombëtare dhe rajonale.

“Flet si perëndimor, vepron si lindor. Aleatët strategjikë e trajtojnë sigurinë e Kosovës si çështje të sigurisë kombëtare, rajonale, europiane dhe euroatlantike. Vetëm Edi Rama nuk e konsideron të tillë.

Aleatët strategjikë e trajtojnë korrupsionin e politikanëve dhe zyrtarëve të lartë në Shqipëri si cënim të sigurisë së tyre kombëtare. Vetëm Edi Rama nuk e konsideron çështje të sigurisë së vendit tonë.

Kosova nuk ka nevojë për leksione demokracie nga një autokrat, por për mbështetje konkrete.

Shqipëria nuk ka kërcënim më të madh ndaj sigurisë së saj kombëtare se korrupsioni që vret vende pune, varfëron shqiptarët dhe shkatërron besimin te institucionet dhe shteti”- shkruan Basha.

Lajmi kryesor:

Përplasja Kurti-Vuçiç në OKB, Rama: Seancë e pakuptimtë! Kosova dhe Serbia të përqendrohen në dialogun e ndërmjetësuar nga BE

B.V/Shqiptarja.com

TAG:
• edi rama
• kosove
• serbi
• aleksander vucic
• OKB