Reforma, nëse nuk miratohet në
qershor shtyhet për në 2019

TIRANE- Reforma territoriale nuk do të prekë mandatet e deputetëve. E gjithë procedura për të ndryshuar hartën administrative të Shqipërisë do të bëhet për të ulur numrin e njësive vendore, pra çka do të thotë të ulet numri i kryetarëve të njësive vendore, por jo të deputetëve. Burime nga Kuvendi bënë me dije për gazetën “Shqiptarja.com” se bashkimi i qarqeve do të bëhet për të ulur numrin e njësive vendore dhe jo të deputetëve.

Procesi
Sipas burimeve bëhet me dije se numri i qarqeve do të reduktohet nga numri aktual që është në 12. Sipas të gjitha gjasave numri do të përgjysmohet, pra do të ngelen 6, por numri i deputetëve nuk do të ndryshojë. Konkretisht nëse bashkohet qarku i Elbasanit dhe i Korçës, zgjedhjet e përgjithshme parlamentare të vitit 2017 do të prodhojnë të njëjtin numër deputetësh. Korça si qark prodhon 12 deputet, ndërsa Elbasani prodhon 14 dhe me bashkimin e këtyre dy qarqeve do të prodhohet po i njëjti numër deputetësh në zgjedhjet e ardhshme parlamentare, pra 26 deputet. Kësisoj kjo nismë e qeverisë nuk do të prekë as Kushtetutën që është edhe problemi kryesor i mazhorancës për miratimin e kësaj reformë. Konkretisht për këtë  ndërhyrje në Kushtetutë kërkohet 2/3 e votave të parlamentit, numër të cilin mazhoranca nuk e disponon. Kësisoj duke mos prekur numrin e mandateve të deputetëve, shumica parlamentare kërkon që të mos bëjë ndërhyrje në Kushtetutë dhe ta miratojë reformën me apo pa opozitën.

Zgjedhjet 2015
Mazhoranca duket se është shumë e vendosur që të miratojë reformën territoriale brenda këtij sesioni parlamentar. Pavarësisht se duket si një nxitim nga ana e shumicës parlamentare, arsyeja e vetme se përse do të bëhet është fakti se nëse dështon në këtë sesion, atëherë reforma shtyhet automatikisht për 4 vite të tjera. Në vitin 2015 do të zhvillohen zgjedhjet vendore, pra të gjithë kryetarët e njësive vendore aktuale do të rimarrin nga një mandat të ri, çka do të thotë se komunat dhe bashkitë nuk reduktohen dot pasi kanë nga një të zgjedhur nga populli. Kësisoj nëse mazhoranca nuk miraton reformën brenda muajit korrik, do të shtyhet deri në vitin 2019 miratimi i ndarjes së re administrative të Shqipërisë.

Shkrimi u publikua sot 24 prill 2014 në gazetën Shqiptarja.com (print)

Redaksia online
(d.a/shqiptarja.com) 

Minoritetet
Pavarësisht se mazhoranca kërkon një ndarje të re territoriale ku synohet që numri i njësive vendore të reduktohet ndjeshëm, zonat minoritare nuk do të preken nga kjo nismë. Burimet nga Kuvendi bënë me dije se këto njësi vendore që përcaktohen si zona minoritare nuk mund të preken nga ndarja e re administrative pasi bashkimi i tyre do të cenonte të drejtat ndërkombëtare të pakicave. Kësisoj zona si Pusteci, Dropulli etj... që karakterizohen si njësi vendore të përbëra nga minoritete nuk do të preken nga ndarja e re dhe do të kenë sërish të njëjtën madhësi si komunë.

/Shqiptarja.com