ELBASAN
Në qarkun e Elbasanit, të gjitha akset nacionale, të bllokuara një natë më parë, janë të kalueshme, mes tyre edhe Qafë Krraba dhe Qafë Thana. Një natë më parë si pasojë e reshjeve të dëborës u bllokua përkohësisht Qafë Krraba, dhe si pasojë e ngricave 9-të mjete u përplasën me njëri tjetrin por pa dëme në njerëz. Në zonat malore automjetet qarkullojnë me zinxhirë.
GJIROKASTER
Në prefekturën e Gjirokastrës janë përfshirë nga bora zonat malore që ndodhen mbi 750 metra mbi nivelin e detit. Trashësia e saj në disa zona ka arritur deri në 25 centrimetra, ndërkohë që akset rrugore kombëtare janë të kalueshme.
Në rrethin e Përmetit është mbuluar nga dëborë komuna Frashër, ku trashësia e dëborës varion nga 10 deri 20 centrimetra. Si rezultat i reshjeve të shiut në komunën Ballaban, është shembur ura që lidh katër fshatra.
VLORE
Në Qafën e Llogarasë, 50 km në jug të Vlorës, reshjet e dëborës kanë vazhduar gjatë gjithë natës. Meteorologët paralajmërojnë se do të vazhdojnë dhe gjatë ditës së sotme. Mësohet se trashësia e dëborës në Qafën e Llogorasë i ka kaluar të 30 cm, ndërsa lëvizja e automjeteve në këtë aks, pjesë e rrugës kombëtare Vlorë-Sarandë, është i mundshëm vetëm me zinxhirë. Drejtoria e Mirëmbajtjes së Rrugëve po punon për të mbajtur të hapur aksin rrugor duke larguar borën dhe hedhur skorje. “Por reshjet e vazhdueshme të dëborës dhe era e ftohtë, po i vështirësojnë gjërat”- ka thënë për atsh drejtori i kësaj drejtorie Edmond Ibro,
KORCË
Në Korë temperaturat kanë arritur vlerat nga -5 deri në -11 gradë celsius gjatë natës. Lëvizja e automjeteve është e vështirë për shkak të shtresave të holla akulli mbi rrugë. Më të prekurat janë Qafa e Malit, Qafa e Thanës, Qafa e Qarit, Gryka e Cangonjit dhe rrugët rurale drejt zonave si , Prespa, Mokra, Voskopoja dhe Vithkuqi.
KUKËS
Në zonën verilindore të vendit të gjitha akset rrugore janë të kalueshme nga mjetet, ndërsa në segmentin Kukës-Qafë Mali dhe Fierzë-Qafë Mali, ku trashësia e dëborës arrin në afro 20 centimetra, lëvizja bëhet vetëm me zinxhirë. Lëvizja me zinxhirë bëhet edhe në akset rrugore Kukës- Shishtavec dhe Kukës -Peshkopi. Situata është normalizuar në segmentin e autostradës Thirr - Kukës- Morin. Po ashtu për mbajtjen nën kontroll e të vazhdueshëm të këtij segmenti janë angazhuar edhe 4 borëpastruese, që mund të ndërhyjnë në çdo moment në rast të reshjeve të dëborës. Vështirësi ka ende në aksin rrugor që lidh komunën e Margegajt me qytetin e Bajram Currit. "Reshjet e dëborës kanë pushuar, por për shkak të trashësisë së dëborës, mbi 40 centimetra, është e vështirë lëvizja e mjeteve pa zinxhirë.