Reshjet e dendura të shiut! Përmbytet shëtitorja në Himarë, prani të ujit në disa banesa! Rrëshqitje dherash në 'Kodrën e Currilave', bllokohet njëri krah i rrugës

Reshjet e shiut të ditës së sotme shkaktuan përmbytje në Himarë pas vërshimit të përroit. Banesat që ndodhen afër shtratit të përroit, kanë prani uji dhe bante në katet e para duke i shkaktuar dëme në orenditë shtëpiake.

“Reshjet kanë qenë shumë të forta dhe përroi u mbush menjëherë. Uji doli në rrugë dhe hyri edhe në shtëpitë tona. Dëmet janë kryesisht në katet e para”, tha një banore.

Gjithashtu presencë të baltës dhe uji ka dhe përpara komisariatit të policisë.

Reshjet e dendura të shiut gjatë ditës së sotme kanë shkaktuar një situatë problematike edhe në fshatin Qeparo të Bashkisë Himarë.

Përmes një njoftimi, kryebashkiaku i Himarës, Vangjel Tavo, ka shkruar se vërshimi i ujit në Qeparo ka shkaktuar përmbytje në rrugë, toka dhe banesa.

Sipas Tavos, intensiteti i lartë i reshjeve, në një kohë shumë të shkurtër, e bëri të pamenaxhueshme gjendjen dhe përballimin e ujit nga infrastruktura kulluese.

“Reshjet e dendura shkaktojnë përmbytje në Qeparo! Vërshimi i ujit në Qeparo ka shkaktuar përmbytje në rrugë, toka dhe banesa. Pamjet e mëposhtme i përkasin lagjes Valta.

Intensiteti i lartë i reshjeve, në një kohë shumë të shkurtër, e bëri të pamenaxhueshme gjendjen dhe përballimin e ujit nga infrastruktura kulluese.

Jemi të gjithë në krye të detyrës për të punuar në normalizimin e gjendjes, riparuar dhe ç’bllokuar kanalet e bllokuara nga dheu dhe materialet inerte që kanë sjellë vërshimi i përrenjve. Jemi në punë, jemi pranë banorëve!”, ka shkruar Tavo në rrjetet sociale.

Po ashtu, përmes një tjetër postimi në rrjetet sociale, Tavo ka bërë të ditur se në qytetin e Himarës, por edhe në zona të tjera, po punohet për kthimin e situatës në normalitet.

Tavo ka shkruar po ashtu se dalja nga shtrati e përroit në zonë ka sjellë depozitime balte dhe materialesh inerte, të cilat kanë krijuar problematika në rrugë dhe në mjedise të tjera publike.

Ai u ka bërë thirrje banorëve të Himarës, por edhe të zonave përreth që të shmangin lëvizjet e panevojshme, deri në përmirësimin e situatës.

“Po punohet për rikthimin e situatës në normalitet! Strukturat e Bashkisë janë në terren dhe në krye të detyrës për të eliminuar pasojat e vërshimit të ujërave në qytetin e Himarës dhe në zona të tjera.

Ndërprerja e reshjeve ka ulur intensitetin e prurjeve, por dalja nga shtrati e përroit ka sjellë depozitime balte dhe materialesh inerte, të cilat kanë krijuar problematika në rrugë dhe në mjedise të tjera publike. Po vijon puna për normalizimin e plotë të situatës.

Bashkia Himarë apelon që qytetarët të shmangin lëvizjet e panevojshme, veçanërisht me automjete, dhe aty ku është e mundur, të bashkëpunojnë për largimin e degëve dhe mbetjeve të pemëve të transportuara nga ujërat”, ka shkruar në një tjetër postim Tavo.

Reshjet e fundit kanë shkaktuar rënien e gurëve dhe dherave në Qafa e Vishës, duke bllokuar njërin krah të rrugës dhe duke vështirësuar ndjeshëm qarkullimin e automjeteve.

Sipas informacioneve nga zona, masivi i gurëve është shkëputur nga shpati përreth dhe ka përfunduar mbi asfalt, ndërsa fatmirësisht nuk raportohet për persona të lënduar. Drejtuesit e mjeteve janë të detyruar të lëvizin me kujdes dhe me shpejtësi të reduktuar, pasi rruga është ngushtuar ndjeshëm.

Autoritetet pritet të ndërhyjnë për pastrimin e segmentit dhe rikthimin e normalitetit në qarkullim.

Pas vërshimit në rrugë e shëtitore, ujërat e shiut, të dala edhe nga kanali kullues që përshkon zonën e Spiles në Himarë kanë përfunduar edhe brenda shtëpive. Aty ku ka nisur të përmbyten jo vetëm oborret e tyre por edhe katet e para. Ujë ka shkuar deri në disa centimetra.

Mjaftojnë disa minuta shi për të kthyer tek qytetarët e Durrësit problematikën e përmbytjes së rrugëve dukë vështirësuar lëvizjen e këmbësoreve dhe mjeteve.  

Pas reshjeve të mesditës, në Kodrën e Currilave, një masiv dheu ka rrëshqitur duke bllokuar njërin krah të lëvizjes së mjeteve. 

Bashkia e Durrësit ka paralajmëruar qytetarët se reshje intensive priten në orët në vijim duke u kërkuar të shmangin lëvizjet e panevojshme.

Qyteti i Durrësit është përfshirë nga reshje të dendura shiu, duke bërë që rrugët rreth stadiumit të mbulohen nga uji. Ndërkohë raportohet për rrëshqitje dherash te kodra e Currilave, ku njëri aks është bllokuar. Por të gjitha rrugët e tjera janë të kalueshme.