Reuters: Marrëveshja e kufirit me
Malin e Zi nxit tensionet në Kosovë

Prestigjiozja britanike Reuters i ka dedikuar një shkrim marrëveshjes së kufirit të Kosovës me Malin e Zi.

Marrëveshja mes dy qeverive ka shkaktuar protesta të dhunshme në të gjithë Kosovën, ku gjashtë persona janë arrestuar pasi dyshohet se kanë hedhur një granatë dhe gaz lotsjellës në parlament.
 
Lart në Bjeshkët e Nemuna, aty ku ndahet Kosova me Malin e Zi, jetojnë Rame Elezaj dhe familja e tij të vendosur në atë territor prej dekadash.

Por nëse Parlamenti i Kosovës do të miratojë nesër demarkacionin me Malin e Zi, e gjithë toka e familjes Elezaj do t’i përkasë një vendi tjetër, ndërsa shtëpia e tij do të mbetet në Kosovë, shkruan Reuters.
 
“Ne e kemi këtë tokë prej vitesh dhe Mali i Zi nuk ka pasur kurrë të tilla pretendime, por tani qeveria do ta japë atë falas”, është shprehur 61-vjeçari për prestigjiozen.

Pa shënjues të kufirit, në malin e thepisur 1700 metër të lartë, Elezaj beson se e gjithë toka e tij i përket Kosovës, por ai nuk ka dokumente që mund ta provojë.
 
Aleatët perëndimorë e kanë kushtëzuar Kosovën në qartësimin e kufijve me vendet ish-jugosllave duke përfshirë edhe Malin e Zi, nëse vendi do të lëvizë pa viza në zonën shengen dhe të vijojë bashkëpunimin e mëtejshëm me Bashkimin Europian.
 
Por në një kohë që qeveria është e gatshme të votojë marrëveshjen, opozita shprehet se nga një veprim i tillë Kosova do t’i japë Malit të Zi 8000 hektarë nga territori.

“Kosova humbet 8200 hektarë, ndër to burime të ujit dhe liqene”, është shprehur Donika Kadaj Bujupi, pjesë e lëvizjes Vetëvendosje. Ndërsa Elezaj shprehet:”Ne do ta mbrojmë vendin me gjakun tonë”.
 
Kosova është shkëputur nga Serbia në vitin 1999 kur NATO ndërhyri për të ndalur dëbimin e shqiptarëve nga serbët. Pas gati një dekade, në shkurt të vitit 2008 vendi me shumicë shqiptare shpalli pavarësinë.

Kosova është njohur nga më shumë se 100 vende duke përfshirë fuqitë e mëdha perëndimore, ndërkohë që Serbia dhe aleati i saj i madh Rusia ende s’e kanë njohur, shkruan Reuters.









Redaksia Online
Al.N/Shqiptarja.com