Rigjallërohet telefonia fikse, rritet numri i pajtimtarëve që preferojnë paketat trefishe

Telefonia fikse ka regjistruar rritje të numrit të pajtimtarëve në tremujorin e fundit të vitit 2018. Të dhënat e Autoritetit të Komunikimeve Elektronike dhe Postare tregojnë se numri i pajtimtarëve të linjave të telefonisë fikse, në fund të dhjetorit të vitit të shkuar, regjistronte 248 mijë, që përbën një rritje me 1.11% në krahasim me tremujorin e tretë 2018 dhe një rritje me 0.4% në krahasim me tremujorin e katërt 2017.

Duket se një pjesë e mirë e pajtimtarëve kanë të integruar me telefonin fiks edhe shërbime të tjera si interneti apo edhe paketat e televizionit dhe është kjo arsyeja kryesore pse përdorin rrjetet fikse.

“Numri i pajtimtarëve me akses Broadband në internet nga rrjete fikse në T4 2018 arriti në rreth 361 mijë, që përbën një rritje me 8.7% në krahasim me tremujorin e mëparshëm dhe një rritje me rreth 22.7% në krahasim me të njëjtin tremujor në vitin 2017. Numri i pajtimtarëve të rrjeteve fikse që kanë akses në shërbime të integruara (Telefoni/Internet/TV) në fund të 3-mujorit të katërt 2018 arriti në rreth 224 mijë, një rritje kjo me 4.3% në krahasim me tremujorin e tretë 2018 dhe rritje me 13.3% krahasuar me tremujorin e katërt 2017”, – thuhet në raportin e AKEP.

I njëjti vlerëson se numri i pajtimtarëve me paketa trefishe (Telefoni, Internet dhe TV) përbën 48% të totalit të pajtimtarëve me paketa të integruara, ndërsa 40% janë me paketa “Internet dhe Telefoni” dhe 12% me paketa “Internet dhe TV”.

Në fund, Autoriteti i Komunikimeve Elektronike dhe Postare ka vlerësuar se 5. 62% e pajtimtarëve me akses broadband në rrjete fikse në fund të tremujorit të katërt 2018 ishin pajtimtarë me paketa të integruara (Telefoni/Internet/TV), ku 30% janë me paketa trefishe (Telefoni, Internet dhe TV)./ Monitor

B.K./Shqiptarja.com

TAG:
• telefoni fikse