Rimbursimi i TVSH, 8 ish-zyrtarë
akuzohen për 515 mln lekë vjedhje

TIRANË- Drejtoria e Tatimeve ka kallëzuar në prokurorinë e Tiranës, 8 ish-drejtues të lartë pasi akuzohen për vjedhjen e 515 milionë lekëve. Gjithashtu në prokurori janë dërguar edhe inspektorë tatimorë në Drejtorinë Rajonale Tatimore Tiranë, për shkelje në procedurat e rimbursimit të TVSH-së.

Në një njoftim të Drejtorisë së Përgjithshme të Tatimeve është bërë e ditur se, “janë pezulluar nga detyra dhe kallëzuar për ndjekje penale në Prokurorinë e Tiranës 8 ish-drejtues dhe inspektorë tatimorë në Drejtorinë Rajonale Tatimore Tiranë”.

Me kërkesë të Drejtorit të Tatimeve, Drejtoria e Auditit të Brendshëm në Ministrinë e Financave ka hetuar procedurat e rimbursimit të TVSH-së në Drejtorinë Rajonale Tatimore Tiranë për periudhën Qershor-Tetor 2013. “Vetëm gjatë ditës së parë janë konstatuar shkelje të rënda në fushën e zbatimit të legjislacionit tatimor për procedurat e rimbursimit të TVSH-së, në 11 raste me pasojë vjedhjen e pasurisë shtetërore në shuma të mëdha, në të cilën janë përfshirë disa persona punonjës të administratës tatimore rajonale të Tiranës”, bënë të ditur burime zyrtare nga drejtoria e Tatimeve.

Faktet dhe elementët e zbuluar plotësojnë elementët e veprës penale “vjedhje e kryer duke shpërdoruar detyrën”, vepër kjo e kryer në bashkëpunim, e parashikuara nga Kodi Penal, bën të ditur drejtoria e Tatimeve.

Sipas tatimeve, “shuma e vjedhjes së shkaktuar është 515.455.275 lekë dhe në të janë përfshirë ish-Drejtori Rajonal Tatimor i Tiranës, ish-Drejtoresha e Kontrollit Tatimor në Drejtorinë Rajonale Tatimore Tiranë, dy ish-përgjegjës të Sektorit të Kontrollit Tatimor në këtë Drejtori si dhe tre inspektorë kontrolli. Për të gjithë këta është kryer pezullimi nga detyra”.

“Gjithashtu në këtë vepër janë bashkëveprues dy persona përfaqësues ligjorë të 11 kompanive private të cilat pas përfitimit të rimbursimeve kanë kryer procedurat e çregjistrimit në Qendrën Kombëtare të Regjistrimit. Për të gjithë personat e sipërpërmendur ditën e hënë datë 21 Tetor 2013 është bërë kallzim penal në Prokurorinë e Rrethit Tiranë”, përfundon deklarata e tatimeve.
 
Redaksia online
(ac/shqiptarja.com)