Rio 2016, atleti francez thyen këmbën
incident izraelito- libanez, ja fituesit

Atleti francez Samir Ait Said  ka thyer këmbën gjatë garës së gjimnastikës në Lojërat Olimpike që po zhvillohen në Brazil.
 
Samir Ait Said  gjatë kërcimit që po realizonte nuk arriti që të koordinohej me saktësi duke rënë shumë keq dhe thyer këmbën, ndërsa pamjet e rënda kanë bërë xhiron e botës.
 
Stafi mjekësor i Said vrapuan drejt tij për t’i dhënë ndihmën e parë, ndërsa të tronditur mbetën jo vetëm mjekët, por edhe të pranishmit që po ndiqnin garën. Dëmtimi i Samir Aït Said është momenti më i rëndë në Lojërat Olimpike të Brazilit.
 
Në ditën e parë është regjistruar dhe incidenti i parë në Lojërat Olimpike që po zhvillohen në Rio. Disa atletë libanezë nuk lejuan disa sportistë izraelitë të hipin na autobusin që do ti dërgonte në stadiumin ‘Maracana’ për ceremoninë hapëse të Lojërave Olimpike të Rio 2016.
 
Dy vendet vazhdojnë të jenë në luftë dhe nuk kanë asnjë marrëdhënie diplomatike. Ndërsa përsa i përket garave, sportistëve fitues dhe shqiptarëve që po marrin pjesë, kosovari Qëndrim Guri, i cili garoi në çiklizëm në garën në 250 kilometra në Lojërat Olimpike, nuk ka arritur që ta përfundonte.
 
Medaljen e artë në garën çiklistike të rrugës e fitoi Greg Van Avermaet, pasi pretendenti  kryesor Vincenzo Nibali u rrëzua 11.8 km nga fundi i garës.
 
Nga Kosova deri tani është eliminuar edhe Urata Rama që konkurroi në garën e 10 metra pushkë me ajër,  u rendit e 48 nga 51 pjesëmarrës.
 
Në disiplinën e notit, britaniku Adam Peaty arriti të vendosë një kohë rekord në 100 metra bretkosë gjatë garave kualifikuese, pasi në 50 metrat e dytë arriti të ndalë kronometrin në 57.55 duke vendosur një rekord të ri botëror në këtë disiplinë dhe rekord të ri olimpik.




Në foto atleti francez me këmbën e thyer 

d.b/shqiptarja.com