Rruga e Elbasanit, Berisha: Do
prishim dhe murin e Brigadave

TIRANE - Zgjerimi i Rrugës së Elbasanit, gjë për të cilën po shkatërrohet tashmë një pjesë e Parkut të Liqenit, do të sjellë edhe prishjen e murit rrethues të Pallatit të Brigadave. Lajmin e ka dhënë vetë Kryeministri i vendit, Sali Berisha, gjatë mbledhjes së sotme të grupit parlamentar të Partisë Demokratike.

“Zgjerimi i Rrugës së Elbasanit do të kryhet”, këmbënguli Berisha, ndonëse nuk mungojnë zërat kritikë ndaj këtij projekti që cilësohet nga ekspertët i tepërt pasi, me inaugurimin e Unazës së Re, trafiku në këtë rrugë do të reduktohet ndjeshëm.

Gjatë mbledhjes së grupit parlamentar ai pranoi se muri në fjalë “është një ndërtim arkitekturor i veçantë”, ndaj dhe për këtë Kryeministri tha se ministria e Transporteve që drejtohet nga Sokol Olldashi do të ngarkohet me ruajtjen e gurëve. Me këta të fundit muri do të rindërtohet, shpjegoi Berisha, ndonëse nuk dha detaje se në ç’mënyrë dhe ku do të rindërtohet ai.

Ai kërkoi nga shoqëria civile që të vëzhgojë nga afër prishjen dhe rindërtimin e këtij muri.

Kryeministri foli edhe për heqjen e imunitetit, heqjen e të cilit tha se e ka propozuar që në vitin 2005. Ai i bëri thirrje kryesocialistit Edi Rama që ta votojë në Parlament projekt ligjin e paraqitur nga demokratët, përndryshe kjo do të kishte “një impakt negativ te votuesit”.

Berisha akuzoi gjithsesi socialistët se nuk kanë ende një qëndrim të qartë mbi heqjen e imunitetit ndërkohë që theksoi se ky ndryshim në Kushtetutë ka si synim shtimin e luftës ndaj korrupsionit dhe përbën një “shërbim të madh ndaj vendit”.

(Foto: Rruga e Elbasanit në pjesën e kthesës së Pallatit të Brigadave)

(im/shqiptarja.com)