Qysh nga dita e parë që kryetari i Komisionit të Reformës në Drejtësi u caktua si ministër i ri i Brendshëm, Partia Demokratike, Sali Berisha dhe media pranë saj filloi avazin e zakonshëm.
 
Shpif e shpif se diçka do të mbetet. Balta nuk kurseu as Fatmir Xhafajn e as familjen e tij.
 
Sigurisht, jo vetëm si një nga deputetët më me përvojë në Parlamentin e Shqipërisë, por dhe si një armik i përbetuar i Sali Berishës, Fatmir Xhafaj ishte një problem më shumë për opozitën, e cila pas largimit të Saimir Tahirit shpresonte se karrigen e ministrit të Brendshëm do e zinte një teknicien.
 
Në këtë aspekt, Fatmir Xhafaj jo vetëm është edhe më politik se Tahiri, por si arkitekti i reformës në drejtësi, ai kishte krijuar armiqësi të pazakontë me të gjithë ata që sot përpiqen ta ndalojnë reformën.
 
Sot gazeta Tema vjen me një investigim të kryer për personat që gjatë javës së fundit kanë hedhur baltën mbi Fatmir Xhafaj për të kaluarën e tij.
 
Bëhet fjalë për dy persona: Xhavit Seferi dhe Valbona Maloku.
 
Xhavit Seferi ka lindur në 18 korrik 1969 në fshatin Cudhi Kamit, Krujë.
 
Në vitin 2003 ka ndryshuar mbiemrin nga Kani në Seferi, edhe pse në Krujë njihet edhe me mbiemrin Koni.
 
Në 19 shkurt 2009, Xhaviti është arrestuar në flagrancë, pasi ka shkaktuar aksident automobilistik duke plagosur dy persona, ndërkohë që dy muaj më vonë është proceduar penalisht pasi ka kërcënuar me jetë një polic rrugor gjatë një tjetër aksidenti me pasoja.
 
Në 20 maj 2010, Xhavit Koni është dënuar në Maqedoni nga Gjykata e Shkupit me arrest në burg për 15 vjet, pasi akuzohet për trafikim të qenieve njerëzore, si anëtar i një grupi të strukturuar kriminal.
 
Më 15 nëntor 2011, është shpallur në kërkim për plagosje me thikë të kushëririt të tij, Fatbardh Kani, dhe vetëm një vit më vonë, kushëriri ka marrë hak duke tentuar ta vrasë me armë zjarri në një atentat në mbikalimin e autostradës së Fushë Krujës.
 
Valbona Maloku ka lindur në 20 shkurt 1968, gjithashtu në Fushë Krujë.
 
Që prej vitit 1990, Valbona, së bashku me bashkëshortin dhe dy vëllezërit, janë larguar nga Shqipëria, duke hyrë në Ambasadën Gjermane.
 
Bashkëshorti i Valbonës është vrarë në Shqipëri në vitin 1999 nga Robert Preni, ndërkohë që hakmarrja e Valbonës mendohet të ketë ardhur vetëm 3 vjet më vonë, duke vrarë vëllain e Robertit, Antonin.
 
Ajo çka e bën edhe më të frikshme historinë e Valbonës, është se ajo dyshohet të ketë urdhëruar vrasjen edhe të një prej vëllezërve të saj, Arben Duka, për të cilin tani derdh lot krokodili.
 
Ndonëse të dhënat flasin vetë, është e qartë se personat që sot hedhin baltë mbi Fatmir Xhafajn, janë njerëz që fillimisht duhet të përgjigjen para drejtësisë për vrasjet, vjedhjet dhe krimet që kanë kryer jo larg në kohë, por gjatë 20 viteve të fundit./Tema

Valbona Duka: Akuzat të pavërteta, do ngre padi
Ndërkohë, përmes një reagimi, Valbona Duka, ka paralajmëruar se akuzat në adresë të saj janë të pavërteta. 

Mesazhi i saj është publikuar nga ish-kryeministri Sali Berisha, në rrjetin social Facebook. 

Reagimi i plotë:
" Zoti Berisha Pershendetje.
Po ju shkruaj juve se jeni nje person i vertet publik.
Lexova qe un akuzohem qe jam nje Vrasese por qe kjo gje nuk esht aspak e vertet dhe kete gje mund ta vertetoj si te duan ato Gazetaret e Edi Rames se un jam nje Qytetare e nderuar ne Gjermani dhe punoj ne bashkine e Germersheim qytetin ne te cilin un jetoj por un jam e gatshme te vij dhe ti perballem drejtesis si te deshirojn gazetaret. Keto jan Shpifje nga me te ndryshmet qe te tromaksin si mund te akuzosh nje person per Vrasese me cfar te drejte e bejn ato Gazetare kete gje. A esht gati Fatmir Xhafa te perballet me drejtesin qe mua nuk me ka torturoar per punen e vllajt tim dhe sikur vllaj te kishe ber un skisha ber gje ,kam then vetem te drejtat dhe se mohoj 
Dhe un nuk ju shkruajta juve per arsye se po behen Protesta por per arsye se ai njeri nuk Merito te jet Minister i Brendshem ai nuk merito te jet fare ne Politik.
Po Arritem prap ne kohen e Enverit skemi drejt te themi as te drejtat tona 
Padia ime ndaj atij gazetari esht ngritur sot dhe do ta shohim sa te verteta jan lajmet kur ai te perballet para drejtesis per shpifje dhe sajime nga me te ndryshmet.
Me Nderime dhe Respekt 
Maloku (Duka)Valbona"

Redaksia Online
Al.N/Shqiptarja.com