Durrës/Pronari në arrati, menaxheri në burg, kapet për herë të 6-të drogë në konteinerë e 'Alba Exotic Fruit’ e sapo ardhur nga Ekuador! Gjenden 10 kg kokainë e fshehur në motorët frigoriferikë

DURRËS- Sërish drogë në Portin e Durrësit dhe sërish është e njëjta kompani, "Alba Exotic Fruit".  Edhe pse menaxheri i saj Barjon Gumeni është në burg, ndërsa administratori i firmës Eduart Dauti, është në kërkim, trafiku i drogës ka vijuar, ku vetëm sot janë kapur 10 kilogramë e 185 gramë lëndë.  Në dy nga konteinerët e ngarkuar me banane, që kishin ardhur nga Ekuadori, për llogari të kësaj firme, u gjetën 10 kilogramë e 185 gramë kokainë, e cila nga sa mësohet ishte fshehur në pjesën fundore, te kapakët e motorëve frigoriferikë, një skemë e përdorur edhe më herët nga "Alba Exotic Fruit".  Për këtë sasi droge të kapur sot është vënë në pranga administratori i ri i kësaj firme, Ermal Arapi.

Kjo kapje për herë të gjashtë të kësaj sasie të kokainës përbën një skandal edhe për institucionet ligjzbatuese që nuk marrin masa me bllokim të aktivitetit të kompanisë. Një kompani e cila çdo një muaj i vjen bashkë me bananet edhe kokaina si ka mundësi që vijon normalisht punën. Kompania e cila menaxherin e ka në burg, një administrator në arrati, dhe nga sot një tjetër administrator në burg, kush e porosit sasinë e drogës? E gjithë kjo histori ka shumë të paqarta dhe më e paqartë është pse SPAK nuk e sekuestron kompaninë?

"Port, Durrës/ Vijon operacioni policor i koduar “Rada”, për goditjen e veprimtarisë kriminale në fushën e trafikimit të lëndëve narkotike.  Sekuestrohet një tjetër sasi kokaine në një nga kontenierët e firmës “Alba Exotic Fruit”. Në kuadër të operacionit “Rada”, të nisur më datë 13.07.2021, në Portin e Durrësit, ku nga Task Forca permanente e përbërë nga Policia Kufitare, strukturat hetimore të Drejtorisë Vendore të Policisë Durrës dhe autoritetet doganore të Portit është gjetur dhe sekuestruar lëndë narkotike kokainë, në një nga kontenierët për llogari të firmës “Alba Exotic Fruit”, tjetër sasi kokaine është sekuestruar ditën e sotme. Në vijim të operacionit “Rada”, mesditën e sotme, nga Task Forca permanente që vepron në Portin e Durrësit, është ushtruar kontroll i imtësishëm në dy nga kontenierët e ngarkuar me banane, që kishin ardhur nga Ekuadori, për llogari të kësaj firme. Si rezultat i kontrollit të imtësishëm, në pjesën fundore, te kapakët e motorëve frigoriferikë të dy kontenierëve u gjet dhe u sekuestrua një sasi prej 10 kilogramë e 185 gramë lëndë narkotike e dyshuar kokainë.    Task Forca permanente që operon në Portin e Durrësit dhe Drejtoria Hetimore në Departamentin e Policisë Kriminale në Policinë e Shtetit vijojnë veprimet hetimore, nën drejtimin e SPAK-ut", njofton Policia. 

LEXO EDHE:
Aktori Mirush Kabashi ‘Qytetar Nderi’ i Durrësit pas vdekjes! E bija, Mendi Kabashi: Është i vonuar, do doja ta merrte sa ishte gjallë!

Përveç rastit të sotëm, "Alba Exotic Fruit" është kapur me kokainë në konteinerët me banane edhe në 5 operacione të tjera. Hera e fundit ishtenë 7 shtator, ku iu kapën  7.7 kg kokainë . Ndërkohë më herët, në 13 korrik në Portin e Durrësit kësaj kompanie dhe u sekuestruan 11 kg e 675 gramë kokainë,  ndërsa 10 ditë më vonë, më 23 korrik u gjetën 6.5 kilogramë të tjera, të cilat ishin fshehur në kontejnerët e po të njëjtës kompani.  Më 29 korrik 2021 kompanisë iu gjetën dhe u sekuestruan 7.25 kilogramë kokainë po në vijim të operacionit “Rada”. Kompania 'Alba Exotic Fruit' rezulton e përmendur edhe më parë në 'historinë' me trafik droge ku në vitin 2019, në kontejnerët e kësaj kompanie, në Pire të Greqisë u gjetën 137 kg kokainë që u zëvendësua me oriz me GPS nga autoritetet. Për kokainën e ngarkuar në kontejnerët e 'Alba Exotic Fruit' në 2019 u arrestuan Altin Myslihaka dhe Ardian Begaj dhe u shpall në kërkim Gentian Malindi.

 

Rendit zhvillimet sipas orarit:

Të Fundit Të Parat

B.K./KT/Shqiptarja.com

TAG:
• kokaine
• Durres
• porti i durresit
• gentian malindi
• ardian bega
• Eduart dauti
• Alba Exotic Fruit
• ekuador
• Bajron Gumeni