‘Çekani i Mesnatës’, SHBA hedh bomba 14-tonëshe në Iran! Pentagoni: Shkatërruam ambiciet bërthamore! Shpërthime të reja në Teheran, iranianët: Të mbyllet Hormuzi, hakmarrje! (VIDEO)

Forcat Ajrore Izraelite kryen sulme të reja në Iran në mbrëmje (22 qershor) për të shkatërruar vendet e magazinimit dhe lëshimit të raketave.

Lajmin e dha vetë selia e ushtrisë izraelite, IDF.

"Rreth 20 avionë luftarakë të Forcave Ajrore Izraelite kryen sulme të bazuara në inteligjencë, duke përdorur mbi 30 municione kundër objektivave ushtarake në Iran", thuhet në deklaratë.

Forcat Ajrore "goditën vendet e magazinimit dhe objektet e lëshimit të raketave që synojnë të dëmtojnë Shtetin e Izraelit, si dhe satelitët ushtarakë dhe vendet e radarëve të përdorura për vlerësimin e inteligjencës ajrore në Kermanshah dhe Hamedan, Iranin perëndimor. Përveç kësaj, një lëshues raketash tokë-ajër u godit në zonën e Teheranit", thuhet në deklaratë.

Ndërsa të paktën tre persona u vranë në Iranin qendror në një bastisje izraelite ndaj një ambulance, raportuan mediat lokale.

"Ambulanca ishte në rrugë për të transferuar një pacient kur u dëmtua rëndë nga një sulm me dron", citoi agjencia e lajmeve ISNA Hamidreza Mohammadi Fesharaki, guvernator i Qarkut Najafabad në Provincën qendrore Isfahan.

Kryeministri britanik Keir Starmer dhe Presidenti amerikan Donald Trump kanë zhvilluar një bisedë telefonike mbrëmjen e sotme, njoftoi sapo zyra e Kryeministrit britanik (Downing Street).

“Në këtë bisedë, liderët diskutuan mbi situatën në Lindjen e Mesme dhe ritheksuan rrezikun serioz që paraqet programi bërthamor i Iranit për sigurinë ndërkombëtare,”- thuhet në deklaratë.

Ata diskutuan edhe për veprimet që ndërmorën Shtetet e Bashkuara mbrëmjen e kaluar për të reduktuar kërcënimin, duke u pajtuar se Irani nuk duhet të lejohet kurrë të zhvillojë një armë bërthamore.

Deklarata shton se të dy liderët përsëritën “nevojën që Irani të rikthehet sa më shpejt në tryezën e bisedimeve”, për të arritur një “zgjidhje të qëndrueshme”.

Starmer dhe Trump ranë gjithashtu dakord të “qëndrojnë në kontakt të ngushtë” gjatë ditëve në vijim.

Lajmi i ditës ka qenë sulmi nga SHBA-të ndaj tre bazave sekrete të pasurimit të uraniumit nga Irani për prodhimin e kokave për raketat dhe bombat bërthamore.

Por në qendër të vëmendjes ishin edhe ‘bishat’ e ajrit që realizuan misionin e bujshëm të bombardimit: Avionët B-2.

Ky është momenti kur “Bombarduesit B-2” kthehen në Bazën Ajrore Ëhiteman në Misuri, të dielën pas sulmeve amerikane kundër lokacioneve bërthamore iraniane.

Media amerikane ka shfaqur pamjet teksa mjetet e fuqishme fluturuese, që i ngjajnë më shumë atyre të filmave fantastiko shkencore apo anijeve fluturuese jashtëtokësore, ulen njëri pas tjetrit në pistën e aeroportit ushtarak amerikan.

Agjencia Ndërkombëtare për Energjinë Atomike (AIEA) ka konfirmuar se sulmi amerikan ka shkaktuar dëme të mëdha shtesë në centralin bërthamor të Isfahanit. Lajmi u bë i ditur nga drejtori i përgjithshëm, Rafael Grossi, përmes një deklarate zyrtare.

Centrali kishte qenë më herët objektiv i sulmeve ajrore izraelite.

“Sulmet e fundit të mëngjesit të sotëm kanë dëmtuar ndërtesa të tjera në Isfahan. Përveç kësaj, kemi konstatuar se janë goditur edhe hyrjet në tunelet nëntokësore të këtij siti,” sqaroi Grossi.

Ndërkohë, nuk ka qenë e mundur të vlerësohet shkalla e dëmeve në impiantet e pasurimit të uraniumit në Fordow dhe Natanz.

Sipas mëtejshmit nga AIEA, autoritetet rregullatore iraniane kanë informuar se “nuk është regjistruar asnjë rritje e niveleve të rrezatimit jashtë ambienteve të tre centraleve bërthamore iraniane pas sulmeve të fundit.”

Benjamin Netanyahu, sot te 'Muri i lotëve'

Izraeli është afër shkatërrimit të programit bërthamor dhe raketave balistike të Iranit.

Kështu siguroi kryeministri Benjamin Netanyahu, në një konferencë për shtyp. Ai shtoi gjithashtu se Izraeli nuk do të lejojë veten të bllokohet nga Irani në një konflikt të gjatë.

Kryeministri Netanyahu ka siguruar se kur të arrihen qëllimet, luftimet do ndalen.

"Ne nuk do të lejojmë veten të tërhiqemi në një luftë rraskapitëse me Iranin. Kur të arrijmë qëllimet tona, luftimet do të ndalen", u shpreh ai mes të tjerash.

Aeroplanët luftarakë të forcave izraelite kanë kryer një valë të re sulmesh ndaj vendeve ushtarake iraniane në Teheran dhe në perëndim të Iranit, njofton IDF.

Sulmet janë kryer ndaj objektivave në Tabriz, Shiraz, Ahvaz dhe Teheran, sipas mediave izraelite.

Grupi shiit libanez Hezbollah, shprehu solidaritetin e tij të plotë me Iranin, pas sulmeve të SHBA-së ndaj 3 bazave që shërbenin për pasurimin e uraniumit, me qëllime të ndërtimit të bombave bërthamore.

"Ne pohojmë solidaritetin tonë të plotë me Republikën Islamike, udhëheqësit dhe popullin e saj, dhe besojmë në forcën legjitime të Iranit për t'u përballur me këtë agresion dhe për ta bërë armikun amerikan dhe sionist të ndiejë një humbje të hidhur", tha lëvizja në një deklaratë.

Sipas kësaj deklarate, sulmi zbulon "imazhin e vërtetë të Shteteve të Bashkuara si kërcënimi më i madh për paqen".

Izraeli ka goditur edhe celulën e Hezbollah në Liban gjatë muajve të kaluar, pas asaj të Hamasit në Gaza.

Një këshilltar i  Ali Khamenei tha se bazat amerikane që përdoren për sulmin ndaj objekteve bërthamore iraniane do të konsiderohen për t'u goditur. Ali Akbar Velayati, i cituar nga agjencia Irna, deklaroi se “çdo vend në rajon apo në vende të tjera që përdoret nga forcat amerikane për të sulmuar Iranin, do të jetë një synim i drejtë për ushtrinë tonë”.

Ndërkohë, zëvendësministri iranian i Punëve të Jashtme, Majid Takht-Ravanchi, tha se tani “nuk ka kuptim” të vazhdojnë negociatat me SHBA ose Izraelin, ndërsa Irani është nën sulm.

“Nuk duam të bëjmë biseda vetëm për të bërë biseda”, tha ai në një intervistë për televizionin gjerman ARD. Këto deklarata vijnë pas sulmeve amerikane ndaj tre objekteve kryesore bërthamore të Iranit, dhe pas sulmeve izraelite që nisën më 13 qershor me qëllim shkatërrimin e kapaciteteve bërthamore të vendit.

Irani ka kërcënuar se do të përgjigjet ndaj sulmeve amerikane, duke rritur frikën për një përshkallëzim më të madh në rajon.

Në javët para sulmeve izraelite, presidenti amerikan Donald Trump kishte nisur disa raunde negociatash bërthamore me Teheranin. Shtetet e Bashkuara kanë thënë se janë ende të gatshme për bisedime pas sulmeve ndaj Iranit; sekretari amerikan i Mbrojtjes, Pete Hegseth, tha se janë dërguar mesazhe “publike dhe private” për të dhënë mundësinë Teheranit të rikthehet në tryezën e bisedimeve.

Donald Trump dhe Benjamin Netanyahu

Pasi vendosi të sulmonte Iranin, presidenti amerikan Donald Trump donte të përqendrohej vetëm në bazën e Fordow, por kryeministri izraelit Benjamin Netanyahu e bindi atë që të godiste edhe dy të tjerat; Natanzin dhe Isfahanin. Gazeta ‘Jerusalem Post’ e zbuloi këtë detaj ditën e sotme.

“Katër ditë më parë, pati një tjetër telefonatë midis Netanyahut dhe presidentit amerikan, të cilët kanë folur çdo ditë që nga fillimi i luftës. Gjatë asaj telefonate, Trump tha: 'Kam vendosur të nis një sulm'", citohet të jetë shprehur një zyrtar izraelit për ‘Jerusalem Post’.

Shtëpia e Bardhë me sa duket vendosi ta bënte këtë për shkak të lehtësisë me të cilën Izraeli goditi objektiva të shumtë dhe mori kontrollin e hapësirës ajrore iraniane.

Trump kishte planifikuar vetëm të bombardonte uzinën e pasurimit në Fordow. Por Netanyahu dhe Ministri i Çështjeve Strategjike Ron Dermer "arritën ta bindnin atë të godiste edhe uzinën e Isfahanit dhe vendin e pasurimit në Natanz, të cilin Izraeli e kishte sulmuar tashmë”.

Në ditët para operacionit amerikan, si Izraeli ashtu edhe Shtetet e Bashkuara, kishin shprehur mosmarrëveshje, por ky ishte vetëm një devijim, siguroi media në fjalë.

Presidenti amerikan, Donald Trump, ka marrë meritën për suksesin e operacionit amerikan në Iran.

“Dje kemi arritur një sukses spektakolar ushtarak, duke ua marrë nga duart ‘bombën’,” shkroi ai në një postim në rrjetin Truth, duke kritikuar kongresmenin Thomas Massie nga Kentucky, i cili e kundërshtoi sulmin.

Trump kujtoi se “Irani ka vrarë dhe gjymtuar mijëra amerikanë dhe madje ka pushtuar ambasadën amerikane në Teheran gjatë administratës Carter”.

Ai vazhdoi më tej, duke thënë se Massie “është një demagog me mendje të thjeshtë, që mendon se është një politikë e mirë që Irani të ketë armë bërthamore të nivelit më të lartë, ndërkohë që bërtet ‘Vdekje Amerikës’ sa herë që i jepet rasti.”

Dy liderë të rëndësishëm të opozitës iraniane në mërgim i kanë bërë thirrje udhëheqësit suprem, ajatollah Ali Khamenei, që të japë dorëheqjen dhe të shmangë gjakderdhje të mëtejshme, pas sulmeve të paprecedenta amerikane ndaj impianteve bërthamore iraniane.

Reza Pahlavi, djali i shahut të rrëzuar nga revolucioni islamik i vitit 1979, dhe Maryam Rajavi, udhëheqësja e organizatës Mujaheddinët e Popullit (MEK), e ndaluar në Iran, kanë deklaruar në njoftime të ndara se Khamenei duhet të japë dorëheqjen pas më shumë se një jave lufte midis Iranit dhe Izraelit.

Vendndodhja e Khamenei-t, i cili është në krye të vendit që nga viti 1989, aktualisht nuk dihet. Ai mund të ndodhet në një bunker nëntokësor, në izolim, ndoshta së bashku me një grup bashkëpunëtorësh të ngushtë.

“Tani Khamenei duhet të largohet”, ka deklaruar Rajavi, duke shtuar se “projekti i tij antikombëtar” tashmë është “shkatërruar plotësisht. Jo pajtimit, jo luftës, po ndryshimit të regjimit domethënë fundi i diktaturës fetare nga populli iranian dhe rezistenca iraniane”.

Nga ana tjetër, Pahlavi, udhëheqësi i mbështetësve të monarkisë së përmbysur iraniane, ka thënë se “e vetmja mënyrë e sigurt për të arritur paqen është fundi i këtij regjimi”.

“Ndërsa Khamenei mendon si të përgjigjet nga bunkeri i tij nëntokësor, unë i them: për të mirën e popullit iranian, përgjigju duke dhënë dorëheqjen”, ka shtuar ai.

Në një deklaratë tjetër, fituesja e Çmimit Nobel për Paqen 2023, Narges Mohammadi, e cila ndodhet në Iran me leje pas një dënimi me burg, ka përshkruar qeverinë iraniane si një “regjim fetar, autoritar dhe mizogjin”.

Megjithatë, ajo është shprehur qartë kundër një “lufte shkatërrimtare dhe të pamëshirshme”, duke i bërë thirrje të dy palëve që të pranojnë një “armëpushim të menjëhershëm”.

“Unë besoj fuqishëm se demokracia dhe paqja nuk do të dalin nga korridoret e errëta dhe të tmerrshme të luftës dhe dhunës”, ka deklaruar ajo.

Sipas sekretarit amerikan të Mbrojtjes, Pete Hegseth, sulmet ajrore amerikane “kanë shkatërruar” programin bërthamor iranian, por ai ka theksuar se Uashingtoni nuk synon ta rrëzojë udhëheqjen klerikale të Iranit.

Kryeministri izraelit, Benjamin Netanyahu, duke u lutur sot te 'Muri i Lotëve'

Pak orë pas sulmeve të SHBA-ve ndaj tre bazave sekrete të pasurimit të uraniomit nga Irani, kryeministri i Izraelit, Benjamin Netanyahu ka shkuar në “Murin e Lotëve”, ku mes të tjerash është lutur edhe për aleatin e tij dhe të vendit, presidentin Donald Trump.

"U lartësoftë presidenti i Shteteve të Bashkuara për marrjen e përgjegjësisë për të dëbuar të keqen dhe errësirën nga bota".

Kjo, sipas faqes izraelite të lajmeve ‘Ynet’, edhe ajo që shkruhet në tekstin e lutjes së përgatitur për vizitën e Benjamin Netanyahut në Murin Perëndimor, ku kryeministri izraelit u lut sot (22 qershor), për "suksesin e luftës kundër Iranit dhe për Trumpin", pas bastisjeve amerikane në tre centrale bërthamore në Iran.

Izraeli filloi operacionet ushtarake kundër "objektivave ushtarake" në Iran më 13 qershor.

Presidenti i Republikës Islamike të Iranit, Masoud Pezeshkian, ka dërguar një mesazh të fortë uniteti dhe qëndrueshmirie në rrjetin X.

“Do të ecim së bashku në këtë rrugë. Do ta ruajmë Iranin së bashku. Dhe do t’i tregojmë botës se ky komb i madh është i pathyeshëm. Bashkimi ynë është fitorja.”

Kështu shkruan në X Masoud Pezeshkian, president i Republikës Islamike të Iranit.

Irani është i gatshëm të mbrohet "me çdo mjet të nevojshëm", kështu është shprehur zëdhënësi i Ministrisë së Jashtme iraniane, pas sulmit të Shteteve të Bashkuara ndaj objekteve bërthamore.

"Irani është vendosmërisht i përkushtuar të mbrojë sovranitetin, integritetin territorial, sigurinë kombëtare dhe popullin e tij me çdo mjet të nevojshëm", shkroi Esmail Baghai në rrjetin X, duke dënuar "një agresion të papranueshëm nga një shtet i armatosur me armë bërthamore ndaj një vendi që nuk zotëron armë të tilla".

Sekretari amerikan i Shtetit, Marco Rubio, i ka bërë thirrje Kinës që të ushtrojë ndikimin e saj mbi Iranin, duke e nxitur të mos mbyllë ngushticën strategjike të Hormuzit, pas sulmeve ajrore të SHBA-së ndaj objekteve bërthamore iraniane.

Deklaratat e Rubio-s u bënë gjatë një interviste në emisionin “Sunday Morning Futures with Maria Bartiromo” në Fox News dhe erdhën pasi televizioni shtetëror iranian Press TV raportoi se Parlamenti i Iranit ka miratuar një masë për të mbyllur ngushticën, përmes së cilës kalon rreth 20% e furnizimit global me naftë dhe gaz natyror.

“Inkurajoj qeverinë kineze në Pekin që të komunikojë me ta, sepse varen në mënyrë kritike nga ngushtica e Hormuzit për furnizimin e tyre me naftë”, tha Rubio.

“Nëse do ta ndërmerrnin një hap të tillë, do të ishte një tjetër gabim i rëndë. Do të ishte një vetëvrasje ekonomike për ta. Ne kemi ende disa opsione për ta përballuar këtë situatë, por edhe vende të tjera duhet ta marrin seriozisht. Një veprim i tillë do të dëmtonte ekonomitë e tyre më shumë sesa tonën.”

Rubio theksoi se mbyllja e ngushticës do të përbënte një përshkallëzim të madh që do të kërkonte një përgjigje të vendosur nga Shtetet e Bashkuara dhe vendet e tjera aleate. Ai gjithashtu paralajmëroi Iranin të mos ndërmarrë veprime hakmarrëse, duke e cilësuar një akt të tillë si “gabimin më të madh që ata kanë bërë ndonjëherë”.

Pavarësisht tensioneve në rritje, Rubio ritheksoi se SHBA mbetet e hapur për dialog me Iranin.

Sekretari amerikan i Shtetit, Marco Rubio, deklaroi se Irani nuk do të guxojë të sfidojë ish-presidentin Donald Trump, duke shtuar se Shtetet e Bashkuara mbeten të hapura për dialog me Teheranin.

“Ne jemi të gatshëm të flasim dhe oferta për bisedime mbetet ende në fuqi,” tha Rubio gjatë një interviste për Fox News.

Ai theksoi gjithashtu se bota është "më e sigurt dhe më stabile" pas sulmeve amerikane ndaj Iranit, duke i cilësuar ato si një përgjigje e domosdoshme në mbrojtje të sigurisë ndërkombëtare.

Ndërkohë, në një intervistë të veçantë për CBS, Rubio u shpreh se aktualisht nuk ka në plan ndërmarrja e operacioneve të reja ushtarake kundër Iranit.

“Për momentin nuk janë parashikuar sulme të tjera,” theksoi ai.

Një sulm ajror i Izraelit ka shkaktuar vdekjen e tre anëtarëve të Gardës Revolucionare paramilitare iraniane, njoftojnë agjencitë e lajmeve të republikës islamike.

Agjencitë Mehr dhe Tasnim bëjnë me dije se sulmi ka ndodhur në provincën Zanjan.

Parlamenti i Teheranit ‘ka arritur në përfundimin se ngushtica e Hormuzit duhet të mbyllet, por vendimin përfundimtar do ta marrë Këshilli i Lartë i Sigurisë Kombëtare’.

Këto janë fjalët e gjeneralit të Gardës Revolucionare, Esmail Koësari, anëtar i komisionit për Sigurinë Kombëtare në Parlament, të cilat i ka raportuar televizioni iranian Press TV.

Ngushtica e Hormuzit është një rrugë strategjike për transportin e naftës dhe gazit të lëngshëm natyror.

Si një “korridor detar” midis Iranit dhe Omanit, ajo lidh Gjirin Persik me Gjirin e Omanit dhe detin Arabik.

Zëvendëspresidenti i Shteteve të Bashkuara, JD Vance, përjashtoi lajm për të dërguar trupa tokësore në Iran, duke ritheksuar qëndrimin e Shtëpisë së Bardhë.

"Nuk kemi asnjë interes të vendosim trupa në terren," deklaroi Vance për Nbc Neës, duke sqaruar se qëllimi i administratës nuk është pushtimi ushtarak.

Vance shpjegoi se ndërhyrja është nxitur nga përfundimet e inteligjencës amerikane:

"Vlerësimet e inteligjencës sonë na shtynë të veprojmë kundër Iranit."

Megjithatë, zëvendëspresidenti amerikan mbajti një qëndrim të hapur ndaj dialogut:

 "Duam të bisedojmë me Iranin për një zgjidhje afatgjatë."

Duke parë nga e ardhmja, ai tha:

"Tani do të punojmë për ta çmontuar në mënyrë të përhershme programin bërthamor iranian në vitet e ardhshme," duke përjashtuar një përshkallëzim të zgjatur:

"Nuk kam frikë se kjo do të shndërrohet në një konflikt të zgjatur."

Ushtria amerikane ka zbuluar detaje të reja mbi sulmet kundër objekteve bërthamore të Iranit. Sipas shefit të Shtabit të Përgjithshëm të Forcave të Armatosura të SHBA-së, gjeneralit Dan Caine, një nëndetëse amerikane ka lëshuar mbi 2 mijë raketa Tomahawk drejt infrastrukturës iraniane që ishte në shënjestër të sulmit.

Gjenerali Caine njoftoi gjithashtu se shtatë bombardues strategjikë B-2 janë përdorur në sulmet ajrore mbi objektet bërthamore iraniane. Këto avionë janë të pajisur për të depërtuar në thellësi të tokës dhe për të shkatërruar objektiva të mbrojtur në mënyrë të veçantë, siç janë impiantet bërthamore të ndodhura nën male apo në bunkerë.

Në total, më shumë se 125 avionë të Forcave Ajrore të SHBA-së kanë marrë pjesë në operacion, përfshirë qindra avionë luftarakë të gjeneratës së katërt dhe të pestë, dhjetëra avionë të furnizimit në ajër, si dhe një nëndetëse taktike që shërbeu si bazë për lëshimin e raketave lundruese.

“Përpjekja për të sulmuar forcat amerikane do të ishte një ide shumë e keqe për Iranin dhe për grupet e tij të ndërlidhura (proxy-t)”.

Kështu u shpreh Sekretari amerikan i Mbrojtjes, Pete Hegseth, gjatë një përgjigjeje ndaj pyetjeve të gazetarëve, duke lëshuar një paralajmërim të drejtpërdrejtë ndaj çdo përpjekjeje për kundërsulm pas operacionit amerikan mbi objektet bërthamore iraniane.

Sulmet ajrore të natës së kaluar kishin për qëllim “komprometimin” dhe “shkatërrimin” e kapaciteteve bërthamore të Iranit dhe e kanë “devastuar” programin bërthamor të vendit. Kështu deklaroi Sekretari amerikan i Mbrojtjes, Pete Hegseth, gjatë një konference për shtyp në Pentagon.

Operacioni ushtarak, i quajtur “Çekani i mesnatës”, u drejtua nga presidenti Donald Trump dhe u realizua nga forcat amerikane kundër impianteve kryesore bërthamore të Iranit. Sipas Hegseth dhe shefit të Shtabit të Përbashkët të ushtrisë amerikane, gjeneral Dan Caine, ambiciet bërthamore të Iranit “janë asgjësuar” pas kësaj ndërhyrjeje.

“Urdhri që morëm nga komandanti ynë i përgjithshëm (presidenti Donald Trump) ishte i qartë, i fuqishëm dhe i saktë”, tha Hegseth.

“E kemi shkatërruar programin bërthamor të Iranit, por duhet theksuar se operacioni nuk ka pasur në shënjestër trupat iraniane apo popullin iranian. Falë udhëheqjes së guximshme dhe vizionare të presidentit Trump dhe përkushtimit të tij për paqen përmes forcës, ambiciet bërthamore të Iranit janë asgjësuar”, shtoi ai.

“Presidenti Trump ka thënë jo armëve bërthamore. Ai dëshiron paqe dhe Irani duhet të ndjekë këtë rrugë”, përfundoi Sekretari amerikan i Mbrojtjes.

Presidenti iranian Masoud Pezeshkian deklaroi se ndërhyrja ushtarake e Shteteve të Bashkuara në konflikt është prova se Uashingtoni është në të vërtetë forca lëvizëse pas ofensivës izraelite kundër Iranit. Sipas Pezeshkian, forcat amerikane janë përfshirë në përplasjen ushtarake vetëm pasi “konstatuan pafuqinë e Izraelit”. Kështu raporton Haaretz, duke cituar mediat iraniane.

Presidenti shtoi se “kombit iranian i ka treguar botës disa herë se nuk kursehet për të mbrojtur ujin dhe tokën e kësaj atdheu”, duke rikonfirmuar vendosmërinë e Teheranit për të mbrojtur sovranitetin e tij përballë çdo agresioni të jashtëm.

Pas sulmeve ajrore të ndërmarra nga Shtetet e Bashkuara kundër impianteve bërthamore iraniane, qeveria izraelite ka shprehur mirënjohjen e saj ndaj presidentit Donald Trump për veprimin e ndërmarrë. Kjo ndjesi duket se reflektohet edhe tek qytetarët izraelitë: në Tel Aviv janë shfaqur pankarta me mbishkrimin në anglisht “Thank you Mr. President”, të shoqëruara me një foto të Trump dhe flamuj amerikanë.

Një imazh satelitor tregon pasojat e sulmit amerikan mbi impiantin bërthamor të Fordow, duke nxjerrë në pah pikën e mundshme të hyrjes së bombave në kompleks.

Ministri i Jashtëm iranian, Seyed Abbas Araghchi, ka akuzuar Shtetet e Bashkuara dhe Izraelin se kanë shkatërruar në mënyrë të qëllimshme negociatat diplomatike lidhur me programin bërthamor iranian, përmes sulmeve të përsëritura ndaj objekteve iraniane.

Në një postim në rrjetin X, Araghchi deklaroi se Teherani ishte në proces negociatash me Uashingtonin, kur ndërhyri Izraeli duke “shpërbërë diplomacinë”. E njëjta situatë – sipas tij – u përsërit disa ditë më vonë, kur Irani po bisedonte me Bashkimin Evropian dhe vendet e grupit E3 (Franca, Gjermania dhe Britania e Madhe).

«Çfarë përfundimi duhet të nxjerrim?», pyeti Araghchi me ton kritik, duke kundërshtuar qëndrimet e Mbretërisë së Bashkuar dhe të përfaqësueses së lartë të BE-së, Kaja Kallas, të cilët i bëjnë thirrje Iranit që të kthehet në tryezën e negociatave.

«Por si mund të kthehet Irani në diçka që nuk e ka braktisur kurrë, e aq më pak ta ketë shkatërruar?», përfundoi ai.

«Fushata nuk ka përfunduar: ditët në vijim mund të jenë të ndjeshme, të ndërlikuara dhe sfiduese». Kështu u shpreh presidenti i Izraelit, Isaac Herzog, duke e cilësuar “historik” sulmin e Donald Trump ndaj Iranit, sipas asaj që raporton BBC.

Herzog shtoi se deklaratat e presidentit amerikan tregojnë aleancën e thellë dhe të guximshme mes Shteteve të Bashkuara dhe Izraelit, dhe u bëri thirrje qytetarëve izraelitë që të vazhdojnë të ndjekin me kujdes udhëzimet për sigurinë të dhëna nga autoritetet.

Demokratët në Shtetet e Bashkuara kanë reaguar me forcë kundër vendimit të presidentit Donald Trump për të bombarduar Iranin.

«Një vendim thellësisht antikushtetues», e cilësoi Bernie Sanders gjatë një mitingu në Tulsa, Oklahoma, në një mesazh të publikuar edhe në rrjetet e tij sociale. Ai i referohet faktit që Trump nuk e ka konsultuar Kongresin përpara se të jepte urdhrin për ndërhyrjen ushtarake.

Edhe kongresistja Alexandria Ocasio-Cortez reagoi ashpër në rrjetet sociale:

«Vendimi katastrofik i Presidentit për të bombarduar Iranin pa autorizim përbën një shkelje të rëndë të Kushtetutës dhe të të drejtave të Kongresit për shpalljen e luftës. Ai rrezikoi në mënyrë të pamatur të shkaktojë një luftë që mund të na mbërthejë për breza».

Ajo shtoi se kjo sjellje përbën një arsye të qartë dhe të justifikuar për fillimin e procedurës së shkarkimit (impeachment).

Duke cituar burime anonime, televizioni amerikan CBS News raporton se Shtetet e Bashkuara i kanë dërguar një mesazh Iranit pas sulmeve të natës së kaluar, duke theksuar se sulmet ishin të kufizuara ndaj programit bërthamor të Republikës Islamike dhe se Uashingtoni nuk po kërkon një ndërrim regjimi.

Ky mesazh shihet si një përpjekje e qartë për të shmangur përshkallëzimin e mëtejshëm të konfliktit.

Numri i të plagosurve të shtruar në spitalet izraelite pas sulmit me raketa nga Irani ka arritur në 86 persona.

Lajmi është konfirmuar nga Ministria e Shëndetësisë e Izraelit, sipas asaj që raporton Times of Israel.

Shumica e uraniumit që më parë ishte ruajtur në impjantin e pasurimit të Fordow-t është zhvendosur në një vend tjetër, ka zbuluar një burim iranian i cituar nga agjencia Mehr.

Ky zhvendim ka ndodhur në një kontekst tensionesh në rritje dhe pas sulmeve të fundit amerikane ndaj impianteve bërthamore iraniane, përfshirë edhe Fordow-n.

Burimi nuk ka bërë të ditur vendndodhjen e saktë ku është transferuar uraniumi.

Video e transmetuar nga media shtetërore iraniane dhe e verifikuar nga CNN tregon tym që ngrihet nga drejtimi i impiantit bërthamor të Fordow, pas sulmit amerikan

Një video e shpërndarë nga agjencia zyrtare iraniane e lajmeve IRNA, e filmuar nga një automjet në lëvizje dhe më pas e verifikuar gjeografikisht nga CNN, tregon një re të madhe tymi të errët që ngrihet në horizont, në drejtim të impjantit bërthamor të Fordow.

Në video dëgjohet një zë që thotë:

“Tymi i vetëm që shihet në qiell mbi Fordow vjen nga impianti bërthamor i Fordow-t.”

CNN thekson se nuk mund të verifikojë në mënyrë të pavarur burimin e tymit, por bazuar në vendndodhjen gjeografike, videoja është xhiruar nga autostrada Teheran-Qom, rreth 13 kilometra në perëndim të impiantit të Fordow-t.

Presidenti amerikan Donald Trump kishte deklaruar se objektet bërthamore në Fordow, Natanz dhe Isfahan ishin "shkatërruar plotësisht" nga sulmet amerikane.

Por autoritetet iraniane e kanë minimizuar ndikimin e sulmit, duke thënë se nuk ka pasur dëme serioze. Një deputet iranian pohoi se Fordow nuk është dëmtuar rëndë, ndërsa gazetarët e medias shtetërore iraniane kanë deklaruar se goditjet kanë dëmtuar vetëm tunelet e hyrjes dhe daljes së impiantit, por jo vetë strukturën e brendshme.

Impianti i Fordow-t ndodhet thellë nën disa shtresa malore, pranë qytetit të shenjtë të Qom-it.

Në ditët që paraprinë sulmet amerikane ndaj impiantit të pasurimit të uraniumit në Fordow, imazhet satelitore tregojnë se mund të jenë bërë përpjekje për të forcuar hyrjet në këtë strukturë nëntokësore të ndërtuar në shpat mali.

Një imazh i datës 19 qershor tregon një rresht prej 16 kamionësh të mëdhenj të ngarkuar me dhe pranë hyrjeve të impiantit, së bashku me makineri për lëvizjen e dheut.

Në një imazh të marrë ditën pasuese, duket se pjesë të rrugës që të çon në tunele janë mbuluar me dhe, ndërsa kamionët e ngarkuar vazhdojnë të lëvizin drejt hyrjeve të kompleksit nëntokësor. Po ashtu, makineri të tjera lëvizëse shihen duke grumbulluar dhe, duke treguar një aktivitet intensiv ndërtimor përreth strukturës.

Sulmi ajror i Shteteve të Bashkuara ndaj impianteve bërthamore iraniane ka qenë "plotësisht i koordinuar" me Izraelin. Kështu deklaroi kryeministri izraelit Benjamin Netanyahu në një mesazh video të shpërndarë nga disa media kombëtare.

Netanyahu e cilësoi presidentin Donald Trump si “një mik i jashtëzakonshëm i Izraelit”. Ai theksoi se operacioni amerikan ishte vazhdimësi e operacioneve ushtarake të Izraelit dhe të shërbimit sekret Mossad në Iran, të cilat kanë pasur si qëllim ndalimin e programit bërthamor iranian, që sipas tij "kërcënonte vetë ekzistencën tonë dhe rrezikonte paqen në botë".

«Presidenti Trump po udhëheq botën e lirë me vendosmëri», u shpreh Netanyahu.

Ai shtoi: «Është një mik i madh i Izraelit, një mik si asnjë tjetër».

Shtetet e Bashkuara kanë nisur një "luftë të rrezikshme kundër Iranit" duke goditur impiantet e tij bërthamore. Kështu deklaron Ministria e Jashtme e Iranit, sipas një njoftimi të shpërndarë nga agjencia gjysmëzyrtare iraniane Tasnim.

«Bota nuk duhet ta harrojë se ishin Shtetet e Bashkuara ato që, në mes të një procesi diplomatik, tradhtuan diplomacinë», thuhet në deklaratë, ku akuzohen SHBA për nisjen e një lufte të rrezikshme kundër Iranit.

Sipas Teheranit, sulmet përbëjnë shkelje të Kartës së Kombeve të Bashkuara dhe të së drejtës ndërkombëtare, dhe qeveria amerikane mban përgjegjësinë e plotë për pasojat e rënda dhe ndikimet e tmerrshme të këtij akti kriminal.

Në deklaratë theksohet se është “e drejta legjitime e Iranit të rezistojë plotësisht dhe me vendosmëri ndaj agresionit ushtarak amerikan dhe krimeve të këtij regjimi banditesk”, si dhe të mbrojë sigurinë dhe interesat kombëtare të vendit me çdo mjet të nevojshëm.

Teherani gjithashtu u bën thirrje Kombeve të Bashkuara dhe organizmave të saj përkatës, përfshirë Agjencinë Ndërkombëtare për Energjinë Atomike (AIEA), që është autoriteti ndërkombëtar i mbikëqyrjes bërthamore, të ndërhyjnë menjëherë për të përballuar këtë akt të hapur dhe kriminal të paligjshmërisë.

Administrata Trump po përgatitet për kundërpërgjigje të mundshme nga Irani, dhe 48 orët e ardhshme konsiderohen veçanërisht shqetësuese. Lajmin e raporton televizioni amerikan NBC, duke cituar dy zyrtarë të Departamentit të Mbrojtjes dhe një zyrtar të lartë të Shtëpisë së Bardhë.

Zyrtarët kanë theksuar se nuk është e qartë nëse kundërpërgjigja e mundshme do të ndodhë në territore jashtë vendit, brenda SHBA-së apo në të dyja, por po merren masa për të gjitha skenarët.

Dy zyrtarë të përfshirë në planifikimin ushtarak thanë më herët gjatë javës se Irani ka tashmë një plan të gatshëm për të goditur baza dhe burime amerikane në Lindjen e Mesme, nëse situata e kërkon.

Baza dhe burime shtarake të SHBA-së ndodhen në gjendje gatishmërie të lartë prej muajsh, por pas shpërthimit të konfliktit midis Izraelit dhe Iranit më 13 qershor, shqetësimet janë shtuar edhe më shumë. Sipas zyrtarëve amerikanë, ekziston një rrezik real për sulme ndaj interesave amerikane, si nga vetë Irani, ashtu edhe nga grupet aleate të tij në rajon.

Një kanal i lidhur me Gardën Revolucionare iraniane (Pasdaranët) ka njoftuar se “Shtetet e Bashkuara do të përballen me pasojat e sulmit ndaj Iranit. Bazat e tyre në Lindjen e Mesme do të shndërrohen në hi”.

Lidhur me bombardimet e lëshuara mëngjesin e sotëm ndaj Izraelit, Garda Revolucionare ka deklaruar se ka përdorur raketa me rreze të gjatë veprimi, me karburant të ngurtë dhe të lëngshëm, të pajisura me koka luftarake shkatërruese, si dhe ka aplikuar taktika të reja për të shmangur mbrojtjen ajrore të armikut.

Sipas deklaratës, sulmet ishin të drejtuara ndaj aeroportit, një qendre kërkimore biologjike të “entitetit sionist”, si dhe bazave mbështetëse dhe qendrave të komandës.

Shtetet e Bashkuara kanë hedhur 12 bomba të tipit “bunker buster” mbi impiantin bërthamor iranian të Fordow-t, duke përdorur gjashtë avionë bombardues B-2. Lajmi është bërë i ditur nga një burim amerikan për CNN.

E njëjta burim shtoi se nëndetëset amerikane kanë lëshuar 30 raketa cruise Tomahwk (Tlam) ndaj dy impianteve të tjera bërthamore iraniane: Natanz dhe Isfahan. Po ashtu, një nga avionët B-2 ka hedhur edhe dy bomba “bunker buster” mbi impiantin e Natanzit.

Hossein Shariatmadari

Raketa kundër anijeve amerikane dhe mbyllja e ngushticës së Hormuzit – kjo është përgjigjja që Irani kërcënon t’i japë Shteteve të Bashkuara pas sulmit të natës ndaj tre impianteve bërthamore.

«Pas sulmit amerikan ndaj impiantit bërthamor të Fordow-t, tani është radha jonë», ka paralajmëruar Hossein Shariatmadari, kryeredaktor i gazetës konservatore Kayhan, e cila shpesh është identifikuar si “zëdhënëse” e Udhëheqësit Suprem, Ayatollah Ali Khamenei.

Në një mesazh në Telegram, Kayhan citon Shariatmadarin të ketë thënë:

«Pa hezitim dhe pa vonesë, si hap të parë duhet të kryejmë sulme me raketa kundër flotës detare amerikane të vendosur në Bahrein dhe njëkohësisht të mbyllim ngushticën e Hormuzit për anijet amerikane, britanike, gjermane dhe franceze».

Mesazhi përmbyllet me një citat nga Kurani: «Vritini kudo që t’i gjeni».