Shëndetësi, Rama: Pas mësuesve
edhe mjekët e infermierët në testim

TIRANË - Pas testimit për mësuesit edhe mjekët e infermierët do t’i nënshtrohen testimeve të herë pas hershme për të ofruar një shërbim sa më cilësor. Kjo është paralajmëruar nga kryeministri Edi Rama në aktivitetin për shërbime më të mira shëndetësore në Pallatin e Brigadave.

"Do të fillojmë testimi dhe kreditimin e gjithë profesionistëve të sistemit shëndetësor dhe nuk do të mbajmë në spitale dhe në sistem asnjë profesionist që nuk merr kreditë e duhura nga testimi që do të thotë nga njëra anë ti japim mundësi të plotë njerëzve që të jenë në duart e duhura po nga ana tjetër ti japim duarve të duhura mundësinë që mos bëhen si këmbët e dhisë sic kanë qënë gjith këto vite. Nëse ka 9000 sot nga këta 9000 askush mos jetë atje për të marrë rrogën apo për të marrë rryshfetin, por të jetë atje sepse vërtet është një nga 9000 më të mirët."- tha Rama.

2014 është cilësuar nga shefi i qeverisë Edi Rama si një vit i suksesshëm, ndonëse pritshmëritë e qeverisë dhe qytetarëve janë më të larta. Sipas tij u shlyen 40 milionë dollarë borxhe të mbaruara nga qeveria e mëparshme, u garantua furnizimi me barna dhe pajisje shëndetësore i spitaleve dhe qendrave të shëndetit parësor, ndërsa u vunë në punë edhe 10 paketat e parë të kujdesit shëndetësor falas.

Redaksia Online
(a.h/shqiptarja.com)