Renate Axt është lindur më 9 gusht 1934 në Darmstadt të Gjermanisë. Pas mbarimit të maturës u specializua si redaktore e më pas punoi si gazetare në Südwestfunk (Radiotelevizioni i Baden-Badenit dhe Shtutgartit). Ka bashkëpunuar me gazeta të ndryshme ditore. Nga fillimi i vitete 70-të ka ushtruar vetëm profesionin e shkrimtares.

Ajo shkruan poezi dhe prozë për fëmijë e të rritur. Ndër të tjera anëtare e PEN-it gjerman dhe e lidhjes evropiane "Kogge". Në vitin 1986 ftohet në Festivalin Ndërkombëtar të Poezisë në Strugë dhe Mazaro del Vallo.  Renate Axt, e cila sot jeton në Darmstadt, është shpërblyer me çmime të shumta letrare.

BIOGRAFI
 
Veshi i djathtë i tij
më i madh se i majti
 
Të gjithë e tërhoqën atë
 
babai
nëna
e dashura
nusja
gruaja
 
larësi i xhenazeve
 
GJURMË
 
Shtëpia ime në hije
ka zëra gjithfarë
 
Para dere
odiseja e verës dhe lulëkuqja
 
Gjurmë
që era s'i gjeti
 
LUTJE
 
një dy tre
 
e njoh
ishullin e Robinsonit
udhëtimin hënor të Peterit të vogël
e njoh në marsin e fshatarëve
shportëzën e Kësulëkuqes
Donald Duck-un
tashmë e njoh nënën time
e njoh babanë
 
më blini, ju lutem, një qen
 
NGUJUAR
 
Ndarja vjen ngaherë
si një mësymje
kur s'është më asgjë
 
asgjë më, që pyet
 
DITËT QË VIJNË
 
Shilarës të zinj
që i lëviz veç era
 
aty-këtu
trageti
si një optimizëm i lehtë
 
vijnë ditët
ditët që vijnë
 
PARË ME ËMBËLSI
 
Pllaka e skrivanisë sime
 
peizazh me çafkëza dhe
breshka të blerta
 
që ëmbëlsisht i kam parë
por që harrova, t'i ushqej
 
HARRIM
 
Të flemë
në shoqërinë e varrmihësve të vegjël
lulesh të vyshkëta
 
Harrim
 
Le ta festojmë vdekjen tënde dhe timen ta duam
 
si festë
 
I LËNË VETËM
 
I lënë vetëm
fëmija donte
të arrinte retë
 
Fluturoi
Askush s'ia ndaloi rënien
 
Rreth e rrotull urnave hedhin valle mushkonjat dëbora
 
Dhe këngëvaji
 
NGA TASH GJER TE VDEKJA
 
Pa ngurrim
t'i ngresh sytë
drejt qiellit
 
Prore
një çap më tej
 
Ecje e gjatë
nga tash gjer te vdekja
 
MBRËMJE
 
Blirë
jasemin
dhe një petale e pushtë
 
Hija e sahatit të kullës po hesht
 
Rërë e thatë
ajër mjalti
dhe tingull kitare
 
Mbrëmje
që duhen pritur lakuriq
 
Shqipëroi nga gjermanishtja:
FERDINAND LAHOLLI

Lisharës

Shkrimi u botua sot në Suplementin Rilindasi në gazetën Shqiptarja.com (print) 01.09.2013
 
Redaksia Online
(b.m/shqiptarja.com)