Shkarkohet "King Kenny"!
Liverpool në kërkim të trajnerit

Pas 18 muajsh në krye të Liverpulit, Keni Dalglish ka paguar çmimin për një paraqitje të dobët të skuadrës në Premier League, duke u shkarkuar nga posti i trajnerit.

Vendimin për shkarkimin e Dalglishit e kanë marrë drejtuesit e klubit, pasi skuadra e mbylli kampionatin në vendin e nëntë në renditje, që ishte pozita më e dobët që kur kampionati luhet me këtë format (1992).

''Fenway Sport Group’ dhe klubi i futbollit Liverpul Football njofton se Keni Dalglish do të lërë postin e menaxherit në klub, pasi kontrata e tij përfundon. Pas një shqyrtimi të kujdesshëm të edicionit, drejtuesit e klubit erdhën deri te përfundimi se ndryshimi në krye të stafit të skuadrës është i nevojshëm. Ky nuk ishte një vendim që është arritur lehtë apo me nxitim, por është studiuar me kujdes. Kërkimi për një trajner të ri do të fillojë menjëherë”, thuhet në deklaratën e klubit nga “Anfield Road”.

61-vjeçari arriti t’i sjellë klubit nga ”Anfield Road” Kupën e Ligës në këtë edicion, që ishte trofeu iparë që nga viti 2006, mirëpo dështoi ta çonte skuadrën në Ligën e Kampionëve, megjithë investimet që ka bërë në tregun e futbollistëve nga janari i vitit të kaluar (rreth 100 milionë Paund të shpenzuara - Endi Keroll, Çarli Adam, Xhordan Henderson dhe Stjuart Douning). Liverpuli në këtë edicion ka realizuar vetëm gjashtë fitore në shtëpi, që është rekordi më i keq në ligë që nga edicioni 1948/1949.(rb/shqiptarja.com)