Shkodër, ambasada SHBA financon
rinovimin e Qendrës të Telemjekësisë

SHKODER - Ambasadori i Shteteve të Bashkuara të Amerikës në Shqipëri, Aleksandër Arvizu, Ministri i Shëndetësisë Vangjel Tavo, përfaqësuesi i Komandës Amerikane për Europën Kol. Uilliam Roberts dhe Shef i Zyrës të Bashkëpunimit të Mbrojtjes Maj. Kristofer Miçëll, iu bashkuan drejtuesve të Spitalit Rajonal të Shkodrës në ceremoninë e përurimit të qendrës së telemjekësisë rinovuar rishtazi.

Kjo qendër telemjekësie është pjesë e fazës së parë të projektit të USAID dhe Departamentit të Mbrojtjes së SHBA për rinovimin e qendrave të telemjekësisë, ku përfshihen edhe spitalet rajonale në Tiranë, Durrës dhe Kukës.

“Zyra e Ndihmave Humanitare e Komandës Amerikane për Europën ofroi 166 mijë dollarë për këtë projekt. Ky projekt përfshin rinovimin e mureve të jashtme dhe të brendshme, vendosjen e dritareve të reja, shtrimin e pllakave te reja, sistemin elektrik dhe ndërtimin e faciliteteve sanitare brenda ndërtesës.”, thuhet në njoftimin për shtyp të Ambasadës.

Telemjekësia do të mundësojë lidhjen e të gjitha spitaleve së bashku në një rrjet virtual dhe do të përmirësojë trainimin dhe edukimin mjekësor në distancë duke përdorur internetin dhe pajisjet e transmetimit me video dhe audio duke lejuar një mjek në një vend të caktuar të diagnostikojë një pacient në një qytet tjetër, ose edhe në një vend tjetër të botës. Duke patur parasysh sëmundjet e reja dhe problemet shëndetësore kuptohet qartë se telemjekësia është një mënyrë për t’i zbuluar më shpejt me qëllim shpëtimin e jetëve dhe zvogëlimin e rreziqeve.

Ky projekt është koordinuar në bashkëpunim me USAID dhe Ministrinë e Shëndetësisë dhe përfaqëson angazhimin e vazhdueshem të Shteteve të Bashkuara dhe Komandës Amerikane për Europën për të punuar së bashku me Republikën e Shqipërisë.

Redaksia Online
(Gre.M/Shqiptarja.com)