Shkolla "Hasan Tahsin", s'hapet
klasa I, 18 fëmijë s'nisin mësimin

TIRANE - Tetëmbëdhjetë fëmijë të klasës së parë në shkollën “Hasan Tahsin” në Tiranë nuk e kanë nisur vitin shkollor si të gjithë të tjerët.
 
Ndonëse të përgatitur me dëshirën për të hyrë në rrugën e dijes, dhe me lule në dorë ata nuk kanë mundur të nisin mësimin pasi nuk u kishte ardhur mësuesja.
 
Duke mos ditur t’i shpjegonin nxënësve të vegjël “çorbën” që bëjnë të mëdhenjtë, nxënësve që prisnin me lule u kanë thënë se mësimi nuk do të mbahej sot pasi mësuesja ishte e sëmurë.
 
“Nuk ishte mësuesja. Prita e prita, dëgjova që mësuesja ishte sëmurë pastaj ikëm”- thotë një nga vogëlushët që nuk mundi të nisë sot klasën e parë. Ai mbante me vete dhe një tufë me lule dhe në fytyrë nuk mundte dot të fshihte mërzitjen.
 
CFARE KA NDODHUR
Bashkia e Tiranës, në projektbuxhetin e 2013-ës, parashikon të japë një fond prej 192 milionë lekësh për prishjen e shkollës 9-vjeçare “Hasan Tahsin” dhe ndërtimin nga themelet të një shkolle të re, si aneks i gjimnazit “Ismail Qemali”.

Pas kundërshtimit të prindërve për të mos mbyllur këtë shkollë, Drejtoria e Shkollës lejoi regjistrimin e fëmijëve të klasës së parë. Por kur ka parë që nuk plotësohej numri i duhur i nxënësve për hapjen e një klase, atëherë ka bërë transferimin e mësueses në një shkollë tjetër,  ndërsa nuk ka informuar prindërit se nuk do të hapej klasa e parë.

Për të hapur një klasë duhet të jenë minimumi 20 fëmijë.
 
Drejtoria e shkollës nuk kishte informuar prindërit që klasa nuk mund të hapej për shkak të mungesës së nxënësve. Në këto kushte prindërit kishin dërguar sot fëmijët në shkollë për të nisur mësimin.


(Në foto: Nxënës të klasës së parë në shkollën "Hasan Tahsin")

Prindërit kanë kundërshtuar fort dhe po sot një përfaqësi e bordit të prindërve të kësaj shkolle kanë shkuar te ministrja e re e Arsimit, Lindita Nikolli. Mësohet se ministrja e re u ka premtuar se do të ngrejë me urgjencë një grup pune dhe nesër do të deërgojë mësuesen e klasës së parë për këta fëmijë.

Redaksia online
(ek/sg/shqiptarja.com)