3.000 lekë është shuma në formën e shpërblimit vënë në dispozicion të pensionistëve dhe disa kategori të tjera, nga qeveria për festat e fundvitit. Shpërndarja e shpërblimit do të nisë që paraditen e të premtes.  Detajet për përfituesit i dha Astrid Hado, drejtor i ISSH, i cili thotë se 649 mijë përfituesit duhet t’i drejtohen Postës Shqiptare, e cila do të bëjë shpërndarjen e lekëve.

“Gjithsej numri i përfituesve është rreth 649 mijë vetë, të cilët do të marrin një fond rreth 1.96 miliardë lekë, rreth 95% të pensioneve  i shpërndajmë përmes Postës Shqiptare, janë dhe një kategori të cilët e marrin në bankë, dhe ata në datën 20, kur bëhet xhirimi i pensioneve mujore, automatikisht do njoftohen”, tha Hado.

Ndërsa Laert Dodaj, drejtori i postës shqiptare, shpalli kalendarin për shpërndarjen e lekëve, në mënyrë që të mos ketë radhë.

“Duke filluar nga data e nesërme, 15 dhjetor, do të tërheqin shpërblim ata pensionistë që kanë datën për t’i marrin nesër pensionet, si dhe pensionistët që e kanë marrë në datën 1 dhjetor. Kështu, duke filluar ditë pas dite ky grafik do të vazhdojë dhe do të bëhet i ditur me mënyrat e ndryshme të komunikimit. Deri në fund të vitit gjithçka do të kalojë pa problem, sportelet do të qëndrojnë të hapura deri në orët e vona që të kalojë gjithçka pa problem”, deklaroi Dodaj.

Shpërblimin prej 3 mijë lekësh të reja në radhët e pensionisteve do të përfitojnë të gjithë, duke nisur nga të moshuarit që marrin pension në fshat e qytet dhe duke vijuar me ish-ushtarakët, pensionet e posaçme, pensionet familjare etj.

d.c./shqiptarja.com