Shpallet sot filmi më i mirë i
“48-orë”-shit merr 200 mijë lekë

TIRANE- Në fundjavën e 20–22 Qershorit është organizuar hedhja e shortit të edicionit të pestë të Festivalit Internacional të filmit të shkurtër “Tirana 48 Hour Film Project”. Janë angazhuar në këtë projekt ekipet e filmave nga e gjithë Shqipëria për të përfunduar filma në një afat shumë të shkurtër brenda 48 orëve. Artistët, me pak gjumë dhe shumë adrenalinë arrijnë të japin filmat e tyre në kohë rekord. Ky është një fenomen kulturor që zhvillohet në 81 vende të botës.

Ky festival i filmit me metrazh të shkurtër ka nisur vite më parë me nismën e artistit dhe regjisorit Robert Aliaj (Dragoti) dhe është vlerësuar si një projekt interesant që krijon intensitet të lartë pune, ide dhe kreativitet. Në Teatrin Kombëtar sot shpallet çmimi për fituesin e filmit më të mirë të vitit për edicionin e 5-të të festivalit të filmit të shkurtër “Tirana 48 Hour Film Project”. Robert Aliaj shprehet për “Shqiptarja.com” se “Tirana 48 Hour Film Project” i jep mundësinë kujtdo të ballafaqohet me vetveten, të guxojë të sfidojë, të tejkalojë mundësitë e tij, etj. Sipas tij “të realizosh një film të metrazhit të shkurtër vetëm për 48 orë, kjo kërkon profesionalizëm të lartë, padyshim”. Në edicionet e kaluara kineastët tanë janë treguar tepër premtues. 

Për pesë vite resht “TIRANA 48 Hour Film Project” përveçse një platformë e fuqishme e prodhimit dhe promovimit të filmave dhe vetë kineastëve ekskluzivisht shqiptarë, kontribuon fuqishëm dhe në promovimin e imazhit të qytetit të Tiranës dhe të turizmit shqiptar. Megjithëse nuk është e lehtë të gjesh fonde për projekte të tilla, për drejtuesin e këtij projekti Robert Aliaj nuk ka asnjë arsye që një krijues të braktis të ekzistuarit nëpërmjet kreativitetit, nevojën për të ëndërruar dhe për t'i shpëtuar realitetit të vështirë shqiptar. “Tirana 48 Hour Film Project” është një garë e vështirë. Koha e realizimit është një tjetër sfidë që hap perspektivën që kineastët e rinj të realizojnë ambicien e tyre profesionale.

Dhe pas një pune të fortë vjen radha e çmimit, pa lënë në harresë shanset e mëdha për rrugën që i hapet filmit të shkurtër shqiptar. Robert Aliaj pohon se “fituesi i edicionit të "TIRANA 48 Hour Film Project" përfaqëson Shqipërinë në një konkurrim, ku 20 nga 100 filmat fitues të vendeve respektive përfaqësohen në Festivalin e Kanës”. “48 Hour Film Project” është një festival i jashtëzakonshëm i filmit të shkurtër në termin e prodhimit dhe promovimit të filmave dhe kineastëve të rinj, ekskluzivisht shqiptarë. 


Shkrimi u botua në Shqiptarja.com (print) në 28 qershor 2014

Redaksia Online
(d.a/shqiptarja.com)