I hedhin tritol tek dera, shpërthen lokali tek Komuna e Parisit në Tiranë (VIDEO)

TIRANE - Një shpërthim me lëndë eksplozive ka ndodhur në orët e para të mëngjesit në një lokal në zonën e Komunës së Parisit në Tiranë. Shpërthimi ka qenë i fuqishëm dhe ka shkaktuar dëme të mëdha materiale, por fatmirësisht nuk ka pasur të lënduar pasi në atë orar nuk ka qenë i pranishëm asnjë person.

Një sasi e vogël lënde shpërthyese është hedhur gjatë orëve të para të mëngjesit të sotëm (rreth orës 03:00) në pjesën e jashtme të lokalit.

E vetmja lëvizje e dyshimtë që policia ka parë në atë orë, është qarkullimi i një automjeti në momentin e shpërthimit, çka dyshohet se mund të jetë makina me të cilën janë larguar autorët.

Siç raporton nga terreni gazetarja e Report Tv Xhensila Kodra, lokali sapo kishte ndërruar pronar i cili po e rikonstruktonte.

Për ngjarjen pati një reagim edhe nga Policia e Tiranës, e cila tha se "në pjesën e derës së një lokali, ka shpërthyer një sasi  e vogël lënde e dyshuar plasëse, duke shkaktuar vetëm dëme materiale".

"Shërbimet e policisë po punojnë për identifikimin dhe kapjen e autori", thuhet në njoftimin paraprak të bluve të kryeqytetit.

Paraprakisht, policia ka dyshime se shkak mund të jetë konkurenca ose ndonjë konflikt të mundshëm që mund të ketë pasur pronari i lokalit me persona të tjerë.

G.M./Shqiptarja.com

TAG:
• policia e tiranes