DURRES - Një shpërthim me eksploziv është shënuar rreth orës 22:00 të mbrëmjes së djeshme, në një godinë 4 katëshe në fshatin Fllakë të Durrësit. Mësohet se godina ishte e pabanuar dhe në ndërtim e sipër, ç`ka fatmirësisht nuk ka sjellë pasoja në njerëz, por vetëm dëme të konsiderueshme materiale. 

Nga uniformat blu bëhet e ditur se godina 4 katëshe ishte pronë e 5 vëllezërve nga Kukësi me mbiemër Neza, ku 4 prej tyre jetojnë në Britaninë e Madhe. Shpërthimi i godinës është bërë me minë kundratank me fitil përcjellës dhe detonator. Vëllezërit Neza prej vitesh janë shpërngulur në zonën e Fllakës, dhe tokën e kanë blerë me dokumente të rregullta. 

Fatri Neza njëri prej vëllezërve i cili jeton në Shqipëri, pasi është marrë në pyetje nga policia për disa orë, shprehet se ata nuk kanë asnjë problem me fqinjët apo me persona të tjerë. Gjithashtu ai siguron se për ndërtimin e objektit kanë disa vite që kanë filluar punimet dhe gjithçka është me leje e dokumente të rregullta ligjore. 

Neza: Nuk kemi asnjë problem
Gazetari: Ka predispozicion nga ana e organeve të rendit dhe policisë për të zbardhur këtë ngjarje?
Neza: - Nuk e di
Gazetari: - Keni vite që jetoni këtu?
Neza: - Po kemi vite dhe s'kemi pasur kështu lloj problemesh

objekti me logo
(Në foto: Godina 4 katëshe mbrëmë pas shpërthimit)

Policia e Durrësit ka marrë në pyetje edhe familjarë të tjerë për disa orë me rradhë, por pa arritur të identifikojnë emra për ngjarjen. Deri tani mbeten ende të paqarta rrethanat dhe autorët. Si rrjedhim uniformat blu nuk kanë asnjë pistë në të cilën të fillojnë hetimet. Çështja në fjalë i ka kaluar Krimeve të Rënda për hetime të mëtejshme dhe zbardhjen e ngjarjes.

Redaksia Online
(e.c/shqiptarja.com)