Shqiptari përplaset ashpër me serbin, kaos në ndeshjen e superligës në Kroaci (VIDEO)

Një përplasje e ashpër mes një futbollisti shqiptar dhe serbe ka ndodhur sot në një ndeshje të kampionatit kroat.

Emir Sahiti përveçse shënoi golin e parë për Hajduk Split përballë Istra-s, në triumfin 0-2 në transfertë të ekipit të tij, mori vëmendjen pas një episodi të ndodhur në minutën e 27-të.

Sulmuesi shqiptar pas një kontakti me lojtarin serb, Mladen Devetak, u përplas edhe fizikisht me të.

Siç shihet edhe në pamjet e publikuara në facebook, në këtë incident gjatë sfidës u përfshinë edhe futbollistë të tjerë, si Ante Erceg dhe Marko Livaja, që është kapiteni i Hajdukut.

Sahiti dhe Devetak ia hodhën paq nga kaosi që krijuan në fushë dhe situata u qetësua nga arbitri, por i vetmi që e pësoi ishte Livaja që u ndëshkua me karton të verdhë.

Tensione dhe përplasje pati edhe pas sfidës, ku disa tifozë janë përleshur me sigurimin.