Dëshmitë e punonjësve të INUV Berat, tregojnë masakrën ndërtimore që ka kryer deputeti i Partisë Demokratike Astrit Veliaj, me qëllim ndërtimin pa leje të kampusit universitar në këtë qytet. Gazeta “Shqiptarja.com”, zbardh dëshmitë nga dosja penale nr.125, ku i pandehur ka qënë subjekti juridik “UFO Shpk” me administrator Astrit Veliaj. Dëshmitë tregojnë më së miri manovrat e Astrit Veliajt për të ndërtuar me çdo kusht kampusin universitar në Berat, qoftë kjo edhe pa pasur asnjë dokumentacion nga organet kopetente shtetërore. Ndërkohë që vetë Astrit Veliaj për këtë çështje është marrë në pyetje dy herë, duke dhënë dëshmi kontradiktore, ku herën e parë ka pohuar se nuk ka lidhje me objektin që ndërtohej, ndërsa herën e dytë pranon se objekti i përkiste atij.