Si u burgos Lef Nosi nga grekët
për dorëshkrimin e Kristoforidhit

TIRANE- Hapin e parë për të shkelur në fushën e leksikografisë së shqipes Lef Nosi e ka bërë, kur u përfshi në furtunën e ngritur për dorëshkrimin e Fjalorit të gjuhës shqipe të gjuhëtarit të shquar, Konstandin Kristoforidhit. Në fillim të vitit 1900 kushdo e dinte në Elbasan, se i biri i Kristoforidhit, Stefani, kishte nevojë ta shiste dorëshkrimin e fjalorit. Familja e pasur e Nosëve i kishte mundësitë dhe ia morën dorëshkrimin me premtimin se do t’i gjenin një çmim të leverdishëm, ndërsa për këtë iu drejtuan konsullatës greke në Durrës, meqë ajo edhe mund ta ndërmerrte shtypjen, pasi lënda ishte me një alfabet të shqipes, të mbështetur në shkronjat greke.