88 ditë pas votimit të 4 marsit - pas krizës më të gjatë dhe më të vështirë në historinë republikane italiane, është arritur marrëveshja për krijimin e qeverisë mes koalicionit të 5 Yjeve-Lega.

Pas një dite të zënë bisedimesh, takimesh dhe negociatash, duket se u gjetën "kushtet" e përshtatshme për krijimin e qeverisë së re në Itali. Pas 3 muajsh ngërci politik duket se kriza politike në Itali është drejt fundit.

Presidenti Mattarella ka dhënë aprovimin e tij për krijimin e qeverisë së re me kryeministër Giuseppe Conten, dhe pritet që betimi të bëhet nesër në orën 16:00.

Takimi mes Luigi Di Maio dhe Matteo Salvinit ka prodhuar dakordësi për një qeverisje politike me profesor Giusepe Conten si kryeministër. Marrëveshja e arritur mes tyre shmang zgjedhjet e parakohshme në Itali.

Giovani Tria është zgjedhur si ministër i Ekonomisë dhe ka zevendësuar emrin e kontestuar të Paolo Savones. Ky i fundit nuk është lënë jashtë kabinetit, por i është besuar ministria e Politikave të Komunitetit.

Në marrëveshjen e parë mes dy partive politike u kundërshtua nga presidenti Mattarella që Savona të vendosej si ministër i Ekonomisë pasi ai shihej si një skeptik i fortë ndaj monedhës euro.

Në një lidhje me Skype nga Italia për Report Tv, gazetari i Corriere della Sera, Leonard Berberi, tha se Conte do të ketë vetëm rol administrativ dhe do të jetë i varur nga dy liderat Di Maio-Salvini që e propozuan si kryeministër të vendit fqinj.

Lista me emrat e qeverisë së re italiane:

President i Këshillit (kryeministër) – Giuseppe Conte

Zv.president i Këshillit (zv.kryeministër) dhe ministër i Punës – Luigi Di Maio (M5S)

Zv.president i Këshillit (zv.kryeministër) dhe ministër i Brendshëm – Matteo Salvini (Lega)

Marrëdhëniet me Parlamentin dhe demokracinë e drejtpërdrejtë – Riccardo Fraccaro (M5S)

Administrata Publike – Giulia Bongiorno (Lega)

Çështjet Rajonale dhe Autonomia – Erika Stefani (Lega)

Ministër për Jugun – Barbara Lezzi (M5S)

Ministër për Personat me Aftësi të Kufizuara – Lorenzo Fontana (Lega)

Ministër i Marrëdhënieve të Jashtme – Enzo Moavero Milanesi

Ministër i Drejtësisë – Alfonso Bonafede (M5S)

Ministër për Mjedisin – Sergio Costa (M5S)

Ministër i Mbrojtjes – Elisabetta Trenta (M5S)

Ministër i Ekonomisë – Giovanni Tria

Ministër për Politikat e Agrikulturës – Gian Marco Centinaio (Lega)

Ministër për Infrastrukturën – Danilo Toninelli (M5S)

Ministër i Arsimit – Marco Bussetti (Lega)

Ministër i Kulturës dhe Turizmit – Alberto Bonisoli (M5S)

Ministër i Shëndetësisë – Giulia Grillo (M5S)

Ministër për Komunitetet – Paolo Savona

Nënsekretar i presidentit të Këshillit (kryeministrit) – Giancarlo Giorgetti (Lega).


(Anëtarët e Kabinetit të ri qeveritar në Itali)