Skandali i rrugës Korçë-Ersekë, dyshimi i korrupsionit fillon gjithmonë nga firma që bën supervizionin dhe roli i ARRSH-së

Skandali i rrugës Korçë-Ersekë, me vlerë 21 milionë euro, e që u shemb pjesërisht pak javë pas përfundimit të punimeve dhe çertifikimit nga mbikëqyrësi, ngre një nga problemet kyçe të tenderëve publikë: Mbikqyrjen e punimeve. Vëmendja mediatike shpesh përqendrohet te fituesi i garave, ndërsa në realitet çështja mbi të cilën duhet të nisin kontrollet është mbikëqyrja. Në fakt, mbikëqyrësi është pothuajse gjithmonë i lidhur (mik dhe ndonjëherë edhe ortak i fshehur) me fituesin e tenderit, dhe kjo i lejon atij të kryejë punë me cilësi më të ulët, duke kursyer në koston e kontratës. Aty ku përfundojnë paratë e kursyera është e sinjali i dytë për korrupsionin që mund te fshihet pas tenderit. Mbikëqyrësi në fakt vendoset nga i njëjti autoritet kontraktor që ka caktuar edhe tenderin për punimet që do të mbikëqyren, që në rastin e rrugëve është ARRSH. Mbikëqyrësja e urës së shembur në rrugën Korçë-Erseke është kompaninë A & E ENGINEERING, me pronare Entela Çano, e cila fitoi mbikëqyrjen e shumë punimeve të mëdha të kryera pothuajse gjithmonë nga e njëjta firmë ndertues. Domethënë, ndërtuesi dhe mbikëqyrësi bëhen, me pëlqimin e ARRSH-së, një lloj çifti fiks, kur për të garantuar punë cilësore duhet të jetë pikërisht e kundërta.

Episodi 1 
Në 20 qershor 2022, Vis Berberi, kryetari i ARRSH, i jep oligarkut Pëllumb Salillari tenderin 14 milionë euro për ‘mirëmbajtje me performance e akseve kryesore të Rajonit Jugor’, loti 4. Oferta fituese është sa fondi limit.  Në 30 qershor 2022, Vis Berberi i shpall pikërisht kompaninë A & E ENGINEERING, me pronare Entela Çano, fituese të tenderit për mbikëqyrjen e punimeve të Salillarit. A është rastësi zgjedhja e Entela Çanos për të mbikqyrur punimet e Salillarit? Përgjigjen e japin faktet.

Episodi 2
Në 30 qershor 2022, Vis Berberi i jep oligarkut Pëllumb Salillari tenderin 14 milionë euro për ‘mirëmbajtje me performance e akseve kryesore të Rajonit Jugor’, kontrata D. Oferta fituese është sa fondi limit. Po atë ditë, në 30 qershor 2022, Vis Berberi i shpall pikërisht kompaninë A & E ENGINEERING, me pronare Entela Çano, fituese të tenderit për mbikëqyrjen e punimeve të Salillarit. Entela Çano nuk shfaqet rastësisht. Zonja është e besuara e Salillarit.

Episodi 3
Në 7 dhjetor 2023, Vis Berberi i jep kompanisë A.N.K të Agim Kolës tenderin me vlerë 20 milionë euro për zgjerimiin e rrugës Elbasan-Qafë-Thanë (Faza IV). (Pronari real i A.N.K dyshohet është ish deputeti i PS Ndue Kola). Në të njëjtën ditë, Berberi dikton kompaninë A & E Engineering të Entela Çanos për të mbikqyrur punimet për zgjerimin e rrugës Elbasan-Qafë-Thanë. Entela Çano ishtë te perfolur për të mbikqyrur punimet nga Berberi dhe A.N.K që në momentin kur A.N.K është paravendosur që do të fitonte tenderin, pra Entela Çano është pjesë e paketës?

Episodi 4
Në 8 gusht 2020, ish kreu i ARRSH-së, Ergys Verdho, shpalli kompaninë A.N.K të Agim Kolës, fituese të lotit të dytë, pjesa e parë e rrugës Korçë-Ersekë, me vlerë tenderi 23.5 milionë euro. Në 15 tetor 2020, Ergys Verdho shpall kompaninë A & E ENGINEERING, me pronare Entela Çano, fituese të tenderit për mbikëqyrjen e punimeve për ndërtimin e rrugës Korçë-Ersekë, loti i dytë pjesa e parë.

Episodi 5
Më 4 prill 2022, kreu i ARRSH-së, Evis Berberi, shpall sërish kompaninë A.N.K të Agim Kolës, fituese të lotit të dytë, pjesa e dytë e rrugës Korçë-Ersekë, me vlerë 21 milionë euro. Në 18 maj 2022, kreu i ARRSH, Elvis Berberi, shpall pikërisht kompaninë A & E ENGINEERING, me pronare Entela Çano, fituese të tenderit për mbikëqyrjen e punimeve për ndërtimin e rrugës Korçë-Ersekë, loti i dytë, pjesa e dytë. Rruga e re Korçë-Ersekë, me gjatësi 35 kilometra, që pritej të inaugurohej që në qershor të vitit të shkuar dhe që ka kushtuar deri më tani 65 milionë euro, ka nisur të shembet. SPAK ka nisur hetimet. Altin Dumani ka nis një grup të BKH-së në terren. Një pjesë e rrugës së shembur është certifikuar nga Entela Çano dhe është marrë në dorëzim nga ARRSH.

Episodi 6
Rrok Gjoka ka fituar tenderin me vlerë rreth 18 milionë euro për ndërtimin e Tunelit të Skërficës ose loti 7 i rrugës Kardhiq-Delvinë. Për të mbikqyrur punimet, ARRSH dhe Gjoka kanë ''diktuar'' Entela Çanon.

Pra paratë publike nuk mund të vidhen pa bashkëpunimin e mbikqyrësit të punimeve, i cili duhet të certifikojë punime të pakryera dhe jo cilësore, devijime, mashtrime, falsifikime. Nëse ka.

(Marrë me shkurtime nga Prapaskena)

xy/Shqiptarja.com

TAG:
• Entela Çano
• ARRSH
• korçë-Erseke
• Korce