Skandali me tenderin e Unazës së Madhe/ Gjykata jep arrest me burg në mungesë për Avdjol Dobin

TIRANË - Gjykata e Tiranës ka vendosur masën e arrestit me burg në mungesë për Avdjol Dobin, 26-vjeçarin administrator të "DH-Albania", kompania e cila fitoi dy tenderë me vlerë 30 mln euro nga ARRSH dhe OST me dokumente të falsfikuara. Masa e sigurisë nga Gjykata është dhënë sot me kërkesë të prokurorisë. Avdjol Dobi është shpallur në kërkim policor që prej zbulimit të skandalit. "DH-Albania" fitoi lotin e parë të "Unazës së Madhe" me vlerë 18 mln euro, pjesë e segmentit nga Pallati me Shigjeta deri te Sheshi Shqiponja. Ndërsa nga OST mori tenderin 12 mln euro për linjën 220 kW Burrel-Peshkopi. Të dy tenderët e anuluan më pas.

Dyshimet mbi Dobin bien se ka falsifikuar dhe ka përdorur më pas një vërtetim të lëshuar nga departamenti i shtetit të Delaware në SHBA, ku tregohej se kompania offshore “Dunwell Haberman”, e cila pretendohet se është mëma e firmës shqiptare “DH-Albania”, nuk kishte detyrime financiare në SHBA dhe se vijonte aktivitetin në fushën e ndërtimit prej 20 vitesh. Ndërsa në të vërtetë rezultoi se “Dunwell Haberman” ishte regjistruar vetëm në korrik 2018 dhe jo në korrik 1998, siç dokumentohej në materialet e depozituara në QKR. 

Pas këtij skandali, Ministria e Infrastrukturës dhe Energjetikës zgjidhi kontratën me bashkimin e operatorëve “DH Albania” & “Biba X” si dhe kallëzoi penalisht kompaninë në Prokurorinë e Tiranës. Ndërsa ARRSH njoftoi rishpalljen e procedurave garuese për lotin e parë të "Unazës së Madhe". Skandali i dy tenderëve solli shkarkimin e drejtorit të ARRSH, Afrim Qendro (Lexo këtu) dhe atij të OST, Klodian Gradeci (Lexo këtu). Të dy dëshmuan edhe në prokurori javën e kaluar, krahas edhe punonjësve të ARRSH-së dhe OST-së. Ata dhanë dëshmi lidhur me administrimin e dokumenteve nga komisioni i vlerësimit të tenderëve (Lexo këtu). 

Për këtë çështje vetë Avdjol Dobi, përpara se të shpallej në kërkim, është thirrur në muajin dhjetor 2018 në ambientet e ARRSH, ku gjatë një takimi me krerët e këtij institucioni, Dobi ka dalë garant dhe ka siguruar se dokumentet e përdorura për fitimin e tenderit janë origjinale. Dobi ka pohuar gjithashtu se nëse nuk vërtetohet në vazhdim se dokumentet janë origjinale, ishte i gatshëm t’ia kalonte të gjithë shumën prej 1.8 milion euro të ngurtësuar në një llogari bankare, e cila rezulton të jetë fondi i garancisë, që kompania “DH-Albania” ka ngurtësuar për këtë projekt. 

Mirëpo, që nga shpallja në kërkim, pas mbërritjes së përgjigjes zyrtare nga autoritetet amerikane për falsifikimin e dokumenteve, Avdjol Dobi dyshohet se është arratisur jashtë vendit, edhe pse nuk figuron i regjistruar në sistemin TIMS. 

/r.k./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Thirrjet për kursimin e energjisë elektrike, mendoni se zbusin pasojat e krizës energjetike?



×

Lajmi i fundit

Ja kush është autori 24-vjeçar i vrasjes në Sarandë (FOTO)

Ja kush është autori 24-vjeçar i vrasjes në Sarandë (FOTO)