Sot, ceremonia e nisjes së stërvitjes së përbashkët shqiptaro-britanike

Sot në ora 17.00, në Komandën e Forcave Ajrore në Rinas do të zhvillohet ceremonia e nisjes së stërvitjes së përbashkët shqiptaro-britanike, ku do të jenë të pranishëm drejtuesit më të lartë të Forcave tona të Armatosura dhe Ambasadës së Britanisë së Madhe në Tiranë.

Me këtë rast, komandanti i Forces Tokësore, gjeneralmajor Zyber Dushku, ambasadori i Mbretërisë së Bashkuar, Nicholas Cannon, si dhe Zv/komandanti i Komandove të Marinës Mbretërore, kolonel Kevin Oliver, do të japin një konferencë për shtyp.

Nga data 30 gusht deri më 16 tetor 2014  zhvillohet stërvitja "Albanian Lion" e ndarë në dy faza, përkatësisht "Albanian Lion '14", 30 gusht-16 shtator dhe "Dragon Hammer '14", 16 shtator -17 tetor 2014.
Stërvitja "Albanian Lion '14" do të fokusohet në kryerjen e operacioneve të evakuimit të civilëve, "Non-Combatant Evacuation Operations", nëpërmjet operacioneve detare, tokësore dhe ajrore. Në këtë stërvitje do të marrin pjesë rreth 600 trupa, të cilët do të kryejnë demonstrime ushtarake në Bizë, në Zall-Herr, në Kepin e Palit, në Kuçovë, Pashaliman dhe Porto Palermo. Trupat do të mbështeten nga deti me katër anije ushtarake.

Ndërsa stërvitja "Dragon Hammer '14" do të zhvillohet në Bizë, me qëllim realizimin e skenarëve taktikë malore. Gjatë kësaj faze të stërvitjes do të shfrytëzohet baza e Kepit të Palit për bazë furnizimi logjistik, si dhe për largimin e trupave dhe automjeteve pjesëmarrëse në "Albanian Lion 2014". /ATSH/