Kosova sot 15 vjet shtet i pavarur! Ish luftëtarët e UÇK ‘festojnë’ në Hagë! Kuvendi seancë solemne! Mban fjalën dhe presidenti Bajram Begaj

Kosova sot shënon 15-vjetorin e Pavarësisë, që u shpall më 17 shkurt të vitit 2008. Mbi 100 shtete, e kanë njohur Kosovën si të pavarur prej atëherë.

Njohja e fundit, sipas të dhënave në faqen zyrtare të Ministrisë së Punëve të Jashtme, ka ardhur nga Izraeli më 1 shkurt të vitit 2021.

Ndërkohë, “Al Jazeera” ka publikuar një hartë që tregon shtetet që e kanë njohur, dhe ato që ende s’e njohin Kosovën si të pavarur.

Presidentja e Kosovës, Vjosa Osmani, njëherësh komandantja supreme e FSK-së, ka thënë se ushtria dhe policia e Kosovës janë të gatshme për të ruajtur çdo cep të territorit të Kosovës.

Në manifestimin qendror të shënimit të 15 vjetorit të pavarësisë, Osmani tha se ushtarët dhe policët tanë janë pasardhës të Ushtrisë Çlirimtare.

“Këta janë pasardhës të Ushtrisë Çlirimtare të Kosovës. Por falënderojmë edhe aleatët tanë strategjik”, tha ajo.

Para qindra qytetarëve, fjalën e mori edhe kryeministri Albin Kurti, i cili tha se ushtarët dhe policët e Kosovës kanë treguar aftësi dhe profesionalitet.

Ai tha se buxhetin për mbrojtje po e rrisin vazhdimisht.

“Këta janë të betuar për të mbrojtur sovranitetin dhe rendin dhe ligjin në Kosovë”, tha ai.

Kryetari i Kuvendit të Kosovës, Glauk Konjufca, ka uruar të gjithë qytetarët e Kosovës e Kosovës për Ditën e Pavarësisë.

Në adresimin e tij në seancën solemne të Kuvendit, ai ka falënderua të gjithë ata që kanë kontribuuar për këtë ditë.

“Trungu ynë u ujit me gjakun e UÇK-së, e cila zhvilloi lutë të drejtë dhe mbrojtëse. Kjo ishte lufte e domosdoshme e popullit tonë, e cila u kurorëzuar me pavarësinë e Republikës së Kosovës”, ka thënë Konjufca.

Nga mbledhja solemne e Kuvendit, Kurti shprehu mirënjohjen e popullit nga shtypja drejt lirisë. Kurti u shpreh se sot, ndihen rrahjet e zemrave ndaj atyre që luftuan për këtë ditë

“Teksa shënojmë ditëlindjen vazhdojmë të ndjejmë rrahjet e zemrave ndaj atyre që luftuan për këtë ditë. Siç rrahin sot jep shteti ynë  dhe pavarësia e tij. Lavdi të gjithë dëshmorëve të kombit, njohje dhe mirënjohje atyre që kontribuuan për shtetin e Kosovës. Mirënjohje dhe respekt për aleatët tanë e ndihmuan popullin tonë nga shtypja drejt lirisë. Gëzuar 17 shkurti dhe urime 15 vjetori i pavarësisë së Kosovës.”- tha ndër të tjera Kurti.

Deputetja e Partisë Demokratike të Kosovës, Ganimete Musliu, ka bërë një akt simbolik sot në seancën solemne të Kuvendit, e cila po mbahet për nder të 15-vjetorit të pavarësisë së Kosovës.

Më të filluar seanca, ajo ka vendosur në foltore të Kuvendit emblemën e Ushtrisë Çlirimtare të Kosovës. 

Presidenti i Shqipërisë, Bajram Begaj ka uruar 15-vjetorin e Pavarësisë së Kosovës duke dhënë një mesazh edhe për tensionet me Serbinë. Begaj thotë se duhet të bashkëpunojnë për stabilitet dhe paqe në rajon.

“Në këtë ditë të shënuar, me mirënjohje kujtojmë Adem Jasharin, UÇK, luftëtarët e lirisë që edhe sot na frymëzojnë për të mbrojtur të shkuarën, të tashmen dhe të ardhmen e një kombi. Kërkojmë sot liderin e forcës së durimin, shqiptarin që çoi përpara kauzën e Republikës së Kosovës dhe ruajti paqen, kujtojmë presidentin Rugova, president i paqes në rajon.

Ju uroj sukses e hapa sa më të shpejtë për anëtarësim në NATO dhe organizata të tjera. Kosova është shtet i lirë e i pavarur, sido që të veprojë Serbia. Qeveria serbe nuk është distancuar nga agresori dhe as ka ndaluar aktivitetin e saj kundër njohjes së republikës së Kosovës. Serbia duhet të bashkëpunojë me Kosovën për stabilitet dhe ruajtjen e paqes në rajon. Ne ballkanasit nuk jemi larg njëri-tjetrit po jemi shembull që distancat s’janë as kriter as pengesë për t’ju gjendur pranë njerëzve e popujve. Gëzuar ditën e pavarësisë së Kosovës, shtet përjetë”, tha Begaj.

Presidentja e Kosovës, Vjosa Osmani ndau mesazhin e veçantë në seancën solemne të Kuvendit të Kosovës, e cila kremtohet me sfidën e madhe të dialogut me Serbinë. Presidentja Osmani u bëri të gjithëve thirrje se pavarësisht ndasive apo këndvështrimeve të ndryshme, të jemi të bashkuar përballë Serbisë, e cila sot e kësaj dite cenon dhe vë në dyshim pavarësinë e Kosovës. Osmani u shpreh se procesi i dialogut me Serbisë e ka një epilog, atë të njohjes reciproke.

“Sot rikujtojmë dhe falënderojmë edhe miqtë, aleatë të cilët i kemi quajtur me të drejtë shpëtimtarë të lirisë të cilët kanë qenë me ne. Kur ne ishim të shtypur e kërkonim lirinë, e kur e fituam dhe gëzonim tokën tonë të lirë ata janë ende me ne. Kosova është shtet i ri, ka dëshmuar demokraci e liri. Institucionet tona po forcohen dita ditës. Sfidat janë të të pranishme, por ja kemi dalë. Gjithsesi na kanë bërë më të fortë.  Kosova nuk mund të jetë ishull i izoluar kundrejt atyre që ndodh në arenën ndërkombëtare. Sot e kësaj dite forcat destruktive provojnë të cenojnë pavarësinë tonë. Përballë Serbisë ne duhet të jemi një, por duhet të jemi të mençur.

Prandaj pavarësisht ndasive në pikëpamje, spektri politik i vendit do të jetë i bashkuar përballë atyre që përpiqen të pengojnë shtetin tonë, ashtu siç kemi qenë kurdoherë. Beteja për anëtarësi të organizatave ndërkombëtare kërkon sfidë të madhe dhe punë të madhe. Shpresojmë ta mbyllim procesin e integrimit, sepse jemi fuqishëm në krah të Ballkanit Perëndimor. Procesi i dialogut me Serbinë e ka një epilog, njohja reciproke. Rendi demokratik, sovraniteti ynë dhe njohja reciproke janë të pa negociueshme.  Të punojmë bashkë që shtetin e republikën ta forcojmë dhe ta zhvillojmë bashkë. Republika jonë është e përjetshme,. Zoti e bekoftë Kosovën, qytetarët e miqtë tanë!”- tha Osmani.

Seanca solemne e Kuvendit të Kosovës ka nisur me interpretim të filarmonisë të Kosovës për 15 vjetorin e Pavarësisë.

Presidentja e Kosovës, Vjosa Osmani ka ndarë një mesazh emocionues në 15-vjetorin shtetit sovran të Kosovës. Osmani thotë se kjo datë na kujton sakrificën që u dha për të qenë Kosova e pavarur. Për këtë, Osmani dhe krerët e shtetit të Kosovës por edhe homologu i saj shqiptar Begaj, kanë shkuar të nderojnë figurat dhe monumentet simbol të Republikës së Kosovës. Osmani kujton me nderim të madh, familjen e Adem Jasharit, ish presidentin historik Ibrahim Rugova si dhe në monumentin e të pagjetura, për të kujtuar se plagët e thella janë ende prezent. Por përtej këtij sfondi, Osmani shprehet 17 shkurti është edhe ditë shprese, që Kosova të jetë pjesë e familjes euroatlantike, atje ku i takon të jetë. 

“Në këtë 15 vjetori të pavarësisë së republikës sonë kujtojmë sakrificën që dhanë më të shtrenjtën, jetën e tyre që Kosova të ishte e pavarur.

Jemi këtu me Presidentin e Republikës së Shqipërisë, kryeministrin dhe kryetarin e Kuvendit por edhe me delegacionet për të nderuar sakrificën e familjes Jashari trimërinë dhe guximin e tyre të cilën u vunë themelet e vendit tonë. Pak më herët  nderuam edhe ish presidentin Ibrahim Rugova, arkitektin e shtetit të Kosovës. Bëmë nderime dhe në monumentin e të pagjeturve, për të kujtuar që plagët janë akoma të thella, bëjmë përpjekje çdo ditë për të gjetur të dashurit tanë.

Sot është ditë shprese, p[re shkak se Kosova jo vetëm që është vendi me më të rinjtë për nga mosha por e ka dhe rrugën e  qartë përpara, ajo rrugë është rruga euroatlantike dhe Kosova e ka aty vendin.”- u shpreh Vjosa Osmani.

Edhe presidenti Begaj uroi 15 vjetorin e Pavarësisë së Kosovës.

“Kënaqësi të jem këtu në 15 vite Pavarësi të Kosovës. Rrugëtimi ynë është përpara, në rrugëtimin euroatlantik."- tha Begaj.

Kryeministri Kurti nga ceremonia e nderimeve të figurave të shquara të shtetit të Kosovës, u shpreh se rruga për të ecur përpara e ka në mendje dhe në kujtesë çmimin e lartë që është paguar për të arrirë pavarësinë e shtetit sovran të Kosovës.

“Teksa festojmë, kujtojmë me mall e krenari ata të cilët vetë mohuan dhe sakrifikuan dhe dhanë jetën për lirinë e vendit. Ardhja jonë këtu, në këtë ditë kaq të rëndësishme tregon që rruga jonë përpara, e ka në mendje dhe në kujtesë çmimin e lartë që kemi paguar për ta pasur pavarësinë. Gëzuar!”- tha Kurti.

17 shkurti i vitit 2008 ishte data kur Kosova e shpalli pavarësinë. Në seancën e asaj dite, 109 nga 120 deputetë morën pjesë në sallë. Deklaratën e pavarësisë e kishte lexuar kryeministri i atëhershëm, Hashim Thaçi, sot në Hagë i akuzuar për krime lufte.

“Ne, udhëheqësit e popullit tonë, të zgjedhur në mënyrë demokratike, nëpërmjet kësaj Deklarate shpallim Kosovën shtet të pavarur dhe sovran. Kjo shpallje pasqyron vullnetin e popullit tonë dhe është në pajtueshmëri të plotë me rekomandimet e të Dërguarit Special të Kombeve të Bashkuara, Martti Ahtisaari, dhe Propozimin e tij Gjithëpërfshirës për Zgjidhjen e Statusit të Kosovës”, thuhej ndër të tjera në deklaratë.

Qytetarët e Kosovës kanë zgjedhur Shqipërinë për festën e pavarësisë. Në Doganën e Morinës pati fluks te larte qytetaresh e mjetesh ndërsa policia kufitare operoi pa kontrolle duke shmangur radhët.

“I uroj krejt shqiptarëve pavarësinë e Kosovës. Kufiri është thjesht formalitet, ne të bashkuar jemi.”- tha një qytetar.

Në këtë 15 vjetor të Pavarësisë, monumenti ‘New Born’ në Kosovë ka marrë një pamje të re me ngjyrat e flamurit.

Çdo vit, pa përjashtim, NEWBORN ka dhënë një mesazh të fortë, duke shënuar çdo vit zhvillimin e Kosovës. Në fotografitë e shpërndara në Facebook, tregohet mesazhi “No New Broken Republic” (Jo Republikë e copëtuar) që i referohet Asociacionit.

“Tema e këtij viti nuk është ndryshe. Në fakt, është provokuese, ndoshta më shumë se herët e tjera, por si gjithmonë është aktuale me gjendjen në të cilën ndodhet populli ynë dhe vendi ynë dhe është një udhëkryq i rëndësishëm drejt shtetësisë së Kosovës.”, shkruhet në fotografitë e shpërndara në Facebook nga faqja që mban emrin e monumentit.

Kompania shqiptaro-amerikane Tafingo që vepron në SHBA dhe Kosovë, tashmë tradicionalisht është bërë e njohur për vendosjen e billboardeve anë e mbanë Amerikes për ditën e pavarësisë së Kosovës.

 Për nder të 15 Vjetorit të Ditës së Pavarësisë së Kosoves ka vendosur billboard në një nga ekranet gjigante në Times Square NY. Mesazhi i billboardit në ekranin gjigant në Times Square, falenderon SHBA për ndihmën e saj për shpalljen e Pavarësisë së Kosovës! Billboardi në vijim vazhdon me disa fotografi të komandantit legjendar Adem Jashari dhe emblemës së UÇK-së.

Në një prononcim për media, pronarët e kompanisë Tafingo, Atdhe dhe Dren Deva theksuan se është tashmë traditë e kompanisë së tyre që 3 vite me radhë promovimi i shtetit të Republikës së Kosovës pikërisht në ditën e pavarësisë në billboarde të ndryshme nëpër Amerikë, dhe këtë gjë e bëjnë me kënaqësinë më të madhe.

Presidenti i Shqipërisë, Bajram Begaj ishte i pranishëm në ngritjen e flamurit të Kosovës në 15-vjetorin e shpalljes së Pavarësisë. Pranë tij qëndronin presidentja e Kosovës Vjosa Osmani, kryeministri Albin Kurti dhe kryetari i Kuvendit Glauk Konjufca.

Kryeministri i Kosovës, Albin Kurti ka uruar të gjithë qytetarët e Kosovës për 15-vjetorin e pavarësisë së vendit të tyre përmes një mbledhjeje “festive”. Arsyeja se pse kreu i qeverisë së Kosovës zgjodhi ta nisë me një mbledhje ishte për të tejçuar mesazhin se vetëm nëpërmjet punës dhe sakrificës, do të arrihet rritja e pavarësisë por më e rëndësishmja do të arrijë të karakterizojë njerëzit e mirë të Kosovës. Kurti u ndal edhe te detyra që i pret në të ardhmen, ku synim mbeten të rinjtë. Ai tha se synimi janë të rinjtë e Kosovës, për të cilët shpreson që 20-vjetori të vijë me dëshirën e tyre për të zgjedhur Kosovën për një të ardhme më të mirë dhe për një jetë profesionale më të plotë.

“Puna e festa për republikën tonë duhet të shkojnë gjithnjë baske. Pavarësia u arrit përmes mundit dhe sakrificës por pavarësia jonë do të rritet vetëm përmes punës. Vetëm përmes punës dhe sakrificës e cila i karakterizon njerëzit e mirë të Kosovës. Ata punojnë këtu por edhe jashtë vendit, ku kushtet janë më të mira.

Detyra jonë kryesore është që kur të vijë 20-vjetori të jenë shtuar dhe shumëfishuar arsyet që të rejat e të rinjtë të mund të zgjedhin Kosovën për një të ardhme profesionale të plotë e për një jetë më të mirë.”- tha Kurti në mbledhjen e qeverisë.