Spanjë/ Atentat ish kreut të Partisë Popullore në mes të Madritit, ndodhet në gjendje të rëndë shëndetësore

Ish kreu  i Partisë Popullore të Katalonjës, I cili ka mbajtur dhe detyrën e zëvendëspresident i Parlamentit Evropian është qëlluar në fytyrë nga një person i armatosur dhe i maskuar në një nga lagjet e pasura të Madridit. Mësohet se Alejo Vidal-Quadras ndodhet në gjendje të rëndë shëndetësore në spital.

Shërbimet e urgjencës të Madridit konfirmuan se një 78-vjeçar kishte marrë një plagë me armë zjarri dhe tha se plumbi kishte kaluar nëpër nofullën e tij.

Ansa raporton se ka qenë ora 13:30 minuta kur Alejo Vidal-Quadras është sulmuar në rrugën Núñez de Balboa, në qendër të Madridit. AI ka qenë duke ecur i vetëm në rrugë kur një person i është afruar dhe e ka qëlluar nga një distancë prej rreth dy metrash.

 Burime policore thanë se Alejo Vidal-Quadras mbërriti në spital i vetdijshëm.

 “Falë Zotit Alejo Vidal Cuadra është jashtë rrezikut për jetën e tij”, tha udhëheqësi i Vox, Santiago Abascal.

 "Tashmë është rënë dakord për paktin famëkeq midis Sanchez dhe Puigdemont që shkatërron sundimin e ligjit në Spanjë dhe i jep fund ndarjes së pushteteve. Kështu kombi ynë do të pushojë së qeni një demokraci liberale dhe do të bëhet një tirani totalitare. Ne spanjollët nuk duhet ta lejojmë”,- ka shkruar  ish-kreu i të PP-së katalanas, Alejo Vidal-Quadras në rrjetet sociale pak minuta para se të bëhej viktimë e atentatit.

Kush është Alejo Vidal-Cuadras?

 Ish profesori i fizikës atomike në Universitetin Autónoma të Barcelonës, Alejo Vidal-Cuadras, 78 vjeç, ka përvojë të gjatë në politikën katalanase. Hapat e parë i hodhi në këshillin bashkiak të qytetit, i zgjedhur në listat e Aleancës Popullore, partisë së qendrës së djathtë, nga viti 1987 deri në ’91. Më pas ishte deputet dhe senator rajonal.

Ai u zgjodh kryetar i PP nga viti 1991 deri në vitin 1996, por u largua nga partia në shenjë proteste për marrëveshjen midis kryeministrit Jose Maria Aznar dhe katalanasve të Convergencia y Uniò. Në vitin 1999 ai u kthye në PP, nga e cila u zgjodh eurodeputet nga viti 1999, dhe deri në vitin 2014 ishte nënkryetar i Parlamentit Evropian.

Më 27 janar 2014, pas mbi tridhjetë vjet militantizmi, ai braktisi Partinë Popullore për të themeluar partinë e re të ekstremit të djathtë Vox, së cilës u bë kryetar i përkohshëm. Një vit më pas, megjithatë, ai dha dorëheqjen nga Vox, pasi u mohua nga partia për mbështetjen e afrimit me partinë centriste Ciudadanos.

K.M/S.G/Shqiptarja.com

TAG:
• Alejo Vidal-Quadras
• spanje